Fundacion Con Animo ta enfrenta un situacion fastioso, mientras cu un grupo di pashent ta expresa miedo y e falta di claridad riba nan futuro, sintiendo nan mes mas sigur den seno di e fundacion cu na Aruba mes. Segun Jean-Paul v/d Kuyp, director di Fundacion Con Animo, durante un entrevista cu Enfoke, e fundacion ta sigui lucha legalmente, cu sosten firme di su profesionalnan. Fuera di esey, Jean-Paul ta conta riba e preocupacion p’e aumento di problema di salud mental, specialmente entre e hobennan afecta pa droga na Aruba, ta alarmente, mientras cu e esfuersonan legal ta sigui ta un pilar fundamental pa avansa den su lucha.
E ta conta cu aworaki Fundación Con Animo a keda cu un grupo, cu segun nan ta sinti cu no ta cla ainda, cu nan tin miedo di yega Aruba, pasobra nan tin miedo cu si nan yega aki, nan no lo logra. Nan ta sinti nan mes na cas n’e fundacion. Segun Jean-Paul, e grupo aki ta bayendo bon. Nan ta puntra frecuentemente con ta bayendo y si a tende algo. Ta bezig ta luchando pa nan via corte. Pero nan ta bon, nan ta realmente apoy’e, nan ta consciente di e decision cu nan a tuma. Jean-Paul a tuma e decision cu e lo carga e pashentnan aki mientras tanto cu nan ta eynan. Motibo pakico e ta haciendo esaki, ta pa nan mes. Tur esaki ta existi door di e pashentnan. Jean-Paul ta luchando p’e pashentnan y no p’e. Esey ta dun’e forsa pa haci lo corecto y sigui carga nan te caminda Dios dun’e forsa.
Sin pashent no tin trabao, el a menciona. E problema cu tin na Aruba di salud mental cu ta tur caminda cu ta den aumento, e falta di cuido, di profesionalismo, ta algo alarmante, vooral cerca e hobennan cu cada biaha ta birando mas hoben cu tin problema cu droga.
PASONAN LEGAL
Via pasonan legal Jean-Paul ta atendiendo. Su contract ta caba na 2026. E ta conta cu Aruba semper tabatin problema cu esaki, di tempo di Arthur Dowers. Nan a manda Axel Naar tambe, via Arthur Dowers mes. Despues Minister Dangui Oduber a manda hopi mas hoben y Minister Rocco Tjon a tuma over y tambe a manda mas. Na 2022 full e team di specialista y instancia concerni, manera DVG, Respaldo, Stichting Hunto, Reclassering, Ministerio Publico, tur a bin bishita Colombia. Tabata mas of menos 8 persona, segun Jean-Paul. Nan a bin haci un bishita di trabao di tres dia pa controla e luga. Wak si e luga ta adecua pa manda mas hende. Nan a bay y na 2023 Minister a firma. Kico esey ta nifica? Esey ta nifica cu automaticamente locual cu e profesionalnan a mira nan a keur goed.
Comment