IVA: Desde 2020 nos ta en espera di un documento di parti di Aruba Dental Society

Inspeccion di Salud Aruba (IVA) a tuma nota di un comunicado cu a sali den prensa di parti di Aruba Dental Society (ADS). Na prome luga nos ta haya importante pa menciona cu cualkier problema of inkietud cuentrega na IVA, lo wordo trata directamente cu e dunado di cuido mes. Pa es motibo, den cuadro di profesionalismo, ADS a haya un reaccion por escrito di IVA caba pa loke ta trata nan expresion di IVA. 

Di parti di IVA nos kier aclaria cu semper nos ta reacciona riba cualkier notificacion y/of keho cu dunadonan di cuido ta entrega cerca IVA. Tur keho entrega cerca nos tocante e calidad di cuido na Aruba, sea via di pashent of dunado di cuido, ta importante. Pues, nos por confirma cu nos no tin ningun carta y/of email di ADS cu nos no a reacciona riba dje. Pa loke ta casonan specifico cu a menciona, nos no por papia di e contenido di ningun caso pa motibo disecreto profesional. Tur dunado di cuido y asociacionnan di profesion (beroepsverenigingen) ta na altura di esaki tambe. Tambe ta importante pa menciona cu IVA NO ta registra e dunadonan di cuido den e registro di AruBIG, pero cu nos ta controla e calidad di nan trabou despues cu nan a registra na DVG unda e toetsing di nan cualificacionnan ta tuma luga. 

E introduccion di e Landsverordening beroepen in de gezondheidszorg (LBIG) ta trece claridad pa cierto profesion den cuido, pero na mes momento tin varios otro profesion unda hopi mester wordo regla ainda. Un di e gruponan aki ta e grupo di cuido dental. Esaki ta un reto cu IVA a constata den e mondzorg rapport di 2020 (bishita www.iva.aw pa lesa e rapport completo). Tur e profesionalnan den cuido dental a ricibi un hard copy di e rapport aki ora a publica esaki. Un conclusion importante tabata cu mester delinea e trabounan di un dentista, tandprotheticus (denturist), mondhygiënist, tandtechnicus etc. den un maneho.

Por ehempel, un dentista cu mester registra den e registro di AruBIG, awo ta conta cu proteccion di su titulo profesional. Pero no pa tur otro gruponan den cuido dental esaki ta e caso. Pues, mester bin mas claridad kico e tereno di trabou di cada ken ta. Esaki ta un tarea comparti unda, entre otro Kwaliteitsinstituut y e grupo di cuido dental y ADS como e expertonan riba e tereno, tin un rol importante. Desde 2020 nos ta den espera di un documento di parti di ADS unda nan ta delinea e diferente trabounan den cuido dental. Si tin algun notificacion y/of keho di un dunado di cuido contra un otro dunado di cuido, por meld esaki cerca nos via [email protected] Un maneho oficial tocante e proceso aki lo wordo publica muy pronto.