Iron Order ta haci donacion na Fundacion Ban Uni un man pa cria nos muchanan

Algun siman pasa 24ora.com/TREMPAN a publica un noticia cu a shock comunidad completo y esaki a yega na curason di un y tur, na momento cu John Fun, presidente di Fundacion Ban Uni un man pa cria nos muchanan, kende tur mainta yuda mucha pa haya nan pan na scol, a bin dilanti y a bisa cu lo bay tin un problema hopi grandi unda cu nan lo mester corta rond di 300 mucha for di e programa aki.

A trece esaki den noticiero y a boga comunidad pa yuda Fundacion Ban Uni un man pa cria nos muchanan. Den esaki a mira cu e wiel a cuminsa lora, a haya varios donacion, a pidi pa haci standing orders na banco pa por yuda cu e continuidad di e fundacion. No solamente esey, pero mas cu tur cos pa no pone ningun mucha na riesgo di keda sin haya un pan na scol.

Hopi biaha kisas den e situacion cu nan ta, esaki por ta nan unico cuminda di e dia. A pidi tur hende pa por yuda e fundacion aki.

Durante Enfoke, por a mira cu comunidad a scucha.

Iron Order Motorcycle Club publicamente a haci un donacion na Fundacion Ban Uni un man pa cria nos muchanan di 4500 florin n’e fundacion.

Segun presidente di e club, Jairo Dania a comenta cu e necesidad ta hopi mas grandi cu e simpel donacion aki. Sinembargo no ta haci esaki pa show off, pero mas bien den e calidad di conscientisa e pueblo eyfo pa si tur hende duna un tiki, hunto ta yega na hopi.

Pa un relato mas amplio, lesa TREMPAN.