Investigacion Arubahuis: AVP ta haya cu Evelyn Wever-Croes mester baha

Pueblo di Aruba ta biba den un pais unda cu democracia ta trapa. Tur dia unda estado di derecho no tin balor y mester puntra si no ta biba den un republica di banana. Esaki ta e realidad, pasobra ora di mira e reglanan den e bukinan di ley, por mira cu gobernante y particularmente partido MEP ta trapa riba e derecho constitucional di e pais aki.

mr. dr. Rycond Santos do Nascimento, parlamentario (AVP), a bisa cu nan a pidi un reunion publico cu mr. Evelyn Wever-Croes. A pidi esey segun e reglanan di reglement van orde. A pidi esaki basa riba constitucion di Aruba. E Presidente di Parlamento, mr. Edgard Vrolijk, tin obligacion di yama e reunion aki. Pero no ta hacie y keda aplasa, ta bin cu excuus. Minister presidente ta bin cu excuus pa no responsabilisa su mes. Ora minister presidente no ta pidi un reunion publico pero un encuentro publico, esey ta algo cu no ta ancra den ningun ley. E ta cambia y bolter e secuencia di pregunta di pregunta den parlamento unda e minister ta duna su marketing y e parlamentarionan mester scucha pa algun ora kico e ta trece dilanti na su manera y antoho.

Esaki simplemente pa core di e posibilidad pa AVP entrega un mocion di desconfiansa contra su persona. Santos do Nascimento a sigui indica cu ora di papia di Arubahuis, ta papia riba responsabilidad di ningun otro hende cu ta di Evelyn Wever-Croes. Pa cinco aña e ta responsabel p’e minister plenipotenciario y Arubahuis. Awe e kier responsabilisa tur otro hende, awe por ta e kier bay bek binti aña di pasado pa tira dede manera e gusta haci riba AVP, pero realidad ta cu Wever-Croes a causa e desaster a tuma luga na Arubahuis. Probablemente ta bay tin un rapport cu ta limpia dje cosnan mas erg cu tabatin fo’i december aña pasa.

E parlamentario kier wak si e mandatario ta bay comparti e documentonan cu pueblo of ta pone ter inzagge. Realidad ta cu tin un MEP cu ta papia hopi di independisa parlamento, pero na momento cu  Evelyn Wever-Croes fluit Edgard Vrolijk, e ta core haci su boluntad di biaha.

mr. Gerlien Croes, parlamentario (AVP), a reacciona riba e situacion cu nan ta andando cu ne awe mainta. El a indica cu algun siman atras su persona a splica ampliamente riba loke a pasa dje situacion di corupcion na Arubahuis. AVP tin un aña largo ta haci peticion n’e minister encarga, esta Minister Presidente di Aruba, pa entrega parlamento e resultado dje investigacion y rapport haci pa CAD cu tin e pruebanan cu e corupcion a tuma luga.

Desde 20 di januari fraccion di AVP a manda pregunta y haya contesta dia 29 di maart. Despues di esey nan a dicidi considerando cu nan tabata keda sconde tra’i e echo cu supuestamente e rapport no ta cla, AVP a bisa no y cu minister presidente mester presenta na parlamento pa splica kico a pasa. Dia pa dia tabatin mas claridad cu a malgasta placa, e minister a haci cos coruptivo y na final di dia el a dal un stap atras pa bisa cu e ta retira comosifuera nada a pasa. El a duna como excuus tabata pa motibo familiar.

E parlamentario a indica cu dia 14 di juni hunto cu su coleganan de Meza y Santos do Nascimento a haci peticion pa un reunion publico. Como contesta nan haya di minister presidente dia 24 di juni cu e investigacion no ta cla. Na october a manda un recordatorio n’e mandatario cu Parlamento di Aruba ta pendiente p’e bin pone su mes responsabel loke ta pasando cu Arubahuis.

Croes a dirigi su mes na Ursell Arends, kende a papia y tabatin un standpunt riba matrimonio di mesun sexo, “pa RAIZ presenta na parlamento y duna di conoce kico nan ta pensa cu un minister presidente ta getawy c’un acto asina di corupcion na Arubahuis comosifuera nada no a pasa.” Ta pasa comosifuera nada a pasa. Tambe ta pasa como e gobierno di mas integro cu Aruba conoce.

Pa mas lesa TREMPAN.COM.