Introduccion di ideologia di genero den scol publico no ta sigui

Recientemente Minister di Enseñansa y Deporte a reuni cu e mayornan concerni riba e preocupacion di e desaroyo cu ta tumando lugar den algun scol, specialmente den e scolnan basico riba e introduccion di ideologia di genero. Dia 7 di december, un grupo di mayor preocupa a tene un conferencia di prensa y a trece luz riba un tema cu ta drentando nos sistema educacional. Ta trata aki di e introduccion di ideologia di genero.

Un conferencia di prensa cu sigur a hala atencion di e pueblo y por a mira e respaldo di pueblo. Manera a splica, e proposito di educacion di mucha na scol ta pa desaroya nan inteligencia cognitivo. Por ehempel, a traves di educacion natural obhetivo, desaroyo di lenguahe,  conocemento general, historia, ciencia comproba y tur locual tin di haber cu esakinan. Tur esaki, hunto cu disciplina, responsabilidad y compromiso cu ta yuda e mucha pa den futuro bira un adulto cu por funciona exitosamente den sociedad y contribui economicamente na nos pais. Ora bo ta papia di ideologia di genero, bo ta papia di un creencia subhetivo. Un creencia subhetivo ta locual un persona ta opina personalmente di un situacion cu no ta basa  riba un berdad obhetivo. 

Mirando e urgencia y e gravedad di e situacionnan cu a ocuri, despues di e conferencia di prensa, e mayornan a sigui cu nan di dos stap y a manda un carta pa Minister di Enseñansa pa asina por elabora mas riba e topico. E minister en cuestion a tuma contacto inmediato cu e mayornan concerni, Grushenca  Arends y Cindy Lacle y a reuni pa elabora mas ariba diferente punto y preocupacion di e  mayornan. Minister Endy Croes a splica, cu e topico di ideologia di genero no ta den e curiculum y a tuma accion di biaha door di pone un stop na esaki den scolnan di DPS (Dienst Publieke Scholen).

Minister a elabora riba e problema social alarmante cu tin na scol y cu mayoria biaha docente  mester interveni y duna un man no solamente cu un desayuno pero tambe cu sosten emocional  cual ta di admira. Pero na e otro banda a wordo comproba cu musica por tin un influencia riba  comportacion di un mucha. E pregunta ta bira, con por ta posibel cu tin asina un problema social  grandi y na scol basico ta permiti musica bulgar, cu ta papia di droga, alcohol, sexualidad,  mensahenan negativo y dobel sinti? Un caminda nos mester cuminsa. Ban cuminsa na e cosnan  chikito pa asina nos por crea un snowball effect. 

Pa finalisa, manera e mayornan concerni a vocifera. Esaki no ta un topico cu nan lo debati.  E ta keda e derecho y responsabilidad di e mayor pa educa nan yiu riba creencia subhetivo.  Na momento c’un persona kita e derecho aki di un mayor bo ta viola e derecho di e mayor.  Na tur mayor, wela/o, tanta/omo y e persona cu a puntra con bo por uni na e causa aki, ta  importante pa monitoria e les cu e mucha ta ricibi na scol. Na momento cu bo tin un duda, sinti  liber di yama e cabesante di scol y trece esaki dilanti.