Inscripcion a cuminsa p’e peregrinacion na Lourdes, Francia

Ya caba e inscripcionnan a cuminsa p’e peregrinacion pa Lourdes, Francia. Isidro ‘Ciro’ Robert ta un devoto di Birgen di Lourdes y el a cu tur hende cu ta desea di bay Lourdes of cu ta desea pa bay Lourdes por inscribi.

Tabatin dos reunion caminda cu hopi hende a asisti. Ya tin 15 persona cu a inscribi, pero tin luga pa mas.

For di Aruba ta sali dia 16 di september, pa yega Hulanda y despues di algun dia, esta dia 19, lo sali fo’i Weert, cu ta cerca di Maastricht pa Lourdes, Francia.

E peregrinacion ta di 9 dia. Ta yega Nevers, Francia, caminda cu e curpa incorupto di Bernadette Soubirous ta reposa. Por mira esaki den e kapel n’e ciudad aki. Despues ta sigui pa Lourdes, cual ta dos dia mas di biahe. Eynan lo honra Mama Maria, haci e oracionnan, tene procesion anochi cu bela y tene n’e protocolnan cu tin n’e luga.

Despues lo regresa Aruba bek, saliendo dia 26 di september pa Weert yegando dia 27. Dia 28 di september lo bay Schiphol y ta bula bay bek Aruba.

No ta prome biaha cu ta tene un peregrinacion. Tin hasta un di e devotonan, Esy Croes, cu a haci e peregrinacion aki. Ta un trabao administrativo caminda cu ta recluta tur esunnan cu kier bay bishita Lourdes. Cualkier persona cu ta desea di bay, por bay na Paradera 39-A of por yama telefon 5821484 of tambe 5944939 y cu gusto lo suministra tur informacion riba e peregrinacion aki.

Dia prome di juni, lo t’e deadline pa tur hende cu ta desea di bay por presenta su formulario di inscripcion pa por biaha. Mester haci e reservacion necesario p’asina por book e vuelo di KLM ya cu tur ta bay y bin bek hunto den e mesun avion.