ImSan a cera acuerdo nobo di pensioen: Mas beneficio pa empleado

Tur trahado di Instituto Medico San Nicolas (ImSan) por conta riba un bon pensioen, pa por lo menos cinco aña mas. Esey ta e areglo cu nan a firma ayera. Director di ImSan, drs. Joel Rajnherc, director di ENNIA, Henry van den Berg y Gina Maduro, presidente di Sindicato ABV, a firma prolongacion di e pensioen colectivo pa empleado di ImSan. E pensioen colectivo a drenta na vigor entrante ayera, dia 1 di augustus 2022 pa un periodo di cinco aña largo, pues te cu 1 di augustus 2027.

Mester menciona cu ImSan, bou guia di actuaris Rishi Achaibersing, di e compania Keesen Actuarissen a acerca varios compania di seguro local pa oferta. Despues di un evaluacion di cada un, a dicidi di scoge pa keda y prolonga e pensioen colectivo cu ImSan tin cu ENNIA pa 5 aña mas. E motibo di e decision aki ta teniendo na cuenta cu ENNIA a ofrece y a mehora e beneficionan pa tur trahado di ImSan.

“ABV ta hopi contento cu resultado di e pensioencontract nobo aki, na unda tur miembro y empleado di ImSan a sali benificia di e contract nobo aki”, asina Gina Maduro, presidente di Arubaanse Bond van werknemers in Verplegende Instellingen (ABV) a vocifera ayera net despues di a caba di firma e contract na ImSan.

Pa por a yega asina leu, ImSan a forma un comision di pensioen interno, cu a canalisa e proyecto aki. Sindicato ABV ta felicita tur miembro cu a duna lo maximo di nan pa por a yega na e bunita acuerdo cu a firma ayera.

E comision ta consisti di:

• Giovanni Jacobs
• Elisa Duijm
• Rose Lyn Gomes
• Ivi Swaen
• Gina Maduro (ABV)
• Lydia Letren (ABV)

E luna aki ainda ENNIA lo organisa algun sesion di informacion na ImSan, pa por comunica cu e miembronan di e beneficionan adicional cu a bin den e pakete di pensioen. Na final, e empleado mester por avansa y e sindicato ta sinti cu a logra den e meta ey. Gina Maduro mes a bisa na final “Cu ABV padilanti bo ta bay!”

Tocante Sindicato ABV

Zuster Elvira Flanegin a funda “Arubaanse Bond van werknemers in Verplegende Instellingen” (ABV) na aña 1968 y a bira e prome presidente. Dr. Horacio E. Oduber Hospital ta un di e organisacionnan di mas grandi den sector priva, cu mas di 1.100 empleado. ABV a crece e ultimo añanan pisa, desde Gina Maduro a tuma liderazgo na 2011. Asina por menciona cu na 2013, ABV a haci su entrada den ImSan como sindicato. A negosha e prome CAO di ImSan na 2015 cu tur nan beneficio primario y secundario (un di e miho CAOnan cu tin den cuido na Aruba) mientras cu na 2018 a negosha e di dos CAO pa ImSan. Na october 2015 ABV a drenta SABA via un referendum. Ey a logra pa e trahadonan cu haya un bevordering desde 2002 pa ahusta nan salario desde januari 2020. A logra un aumento di 0.5% den salario di tur trahado y bonus pa e trahadonan. ABV a drenta FSLMA desde 2017 ora el a bira un fundacion nobo cu ta resorta bou Hospital y na 2018 ora e trahadonan di Ex-PAAZ a bira Respaldo. Miembronan di ABV ta net den e 4 institutonan cu ta haya lumpsum via AZV. ABV ta den diferente comisionnan, entre otro: SER, Ontslagcommissie (DAO) y mas.

Tocante Instituto Medico San Nicolas (ImSan)

A funda Instituto Medico San Nicolas (ImSan) dia 24 di februari 2005 como un centro medico pa tratamento ambulante, situa den e districto di San Nicolas. Tin un filial cu servicio limita situa na Wayaca. Actualmente ImSan ta brinda servicio como un hospital di 22 camber pa estadia corto; servicio di emergencia habri 24 ora pa dia pa brinda asistencia medico urgente. Tambe tin un camber di parto pa dunamento di luz; servicio di dokter di cas; servicio di dokter na warda presente pa por trata problema chikito di salud, cu no por warda riba consulta di dokter di cas propio; centro di diabetes cu terapista pa pia, dietista, asistente pa caso di herida y specialista medico; dos dokter di cas, un dokter di wowo, un cardiologo, un ciruhano y dos partera; un laboratorio y luga unda ta saca sanger tanto planea of urgente (prikpost); departamento di radiografia y servicio di ambulance.

Igmar Reyes ta na cabes di ImSan como presidente, mientras cu drs. Joel Rajnherc ta den funcion di director, desde 1 di maart 2012 y ta raporta directamente na e Hunta di Supervision. ImSan a cera aña 2021 cu 273 empleado, cu ta 35 mas di locual nan a habri aña cu ne. Durante aña 2021 nan a conta cu un presupuesto di mas di 50 miyon florin na entrada, cu ta un aumento di seis miyon, compara cu aña 2020. Ta bon pa menciona cu na 2019, cu tabata aña normal sin pandemia, ImSan a maneha un entrada di apenas 30 miyon florin, pues memey pandemia nan a crece cu 20 miyon florin mas na entrada!