Iglesia catolico ta celebra fiesta di Birgen Maria di Rosario

Awe ta tuma luga nobena di Birgen Maria di Rosario y despues tin e fiesta nacional cu tur devoto. Pa motibo di tempo e encuentro no ta tuma luga mas na Alto Vista, pero den misa di Playa.

Pa misa catolico awe ta un dia masha special, pasobra iglesia ta celebra fiesta di Birgen Maria di Rosario cu tin na Alto Vista. Den lenguahe popular ta yam’e Birgen di Alto Vista, asina Pastoor Andres Makowiec, Vicario Episcopal (representante di obispado di Willemstad na Aruba), a indica. Ta celebra e nobena di preparacion p’e fiesta y ta custumbra cu tur aña ta celebra no solamente nobenario, pero despues un fiesta nacional caminda tur devoto di Birgen Maria ta reuni pa un celebracion special.

Pastoor Andres a comparti cu pa motibo di mal tempo, unda cu diahuebs tabatin awasero incluso awe mainta, p’esey nan no por tuma riesgo awe nochi. Ta sigui e pronostico di tempo y a dicidi pa e fiesta principal di awe nochi no ta reuni na e kapel di Alto Vista. Pastoor ta invita tur devoto di Birgen Maria di Alto Vista pa reuni na misa di Playa, Pro Catedral San Francisco, cu ta e misa central pa haci e salbacionnan. E salbacion tabata planea pa ta tuma luga 5:00 pm na Alto Vista, esaki ta bira awo 6:00 di atardi unda ta cuminsa cu e exposicion di sacramento cu rosario na mama Maria.

Ta trata e rosario di bida misericordia, pasobra awe ta prome diabierna di luna. Despues pa 7:00 pm ta sigui cu salbacion di eucaristia. Kier expresa nan comunion, nan union na tur pastoor, tur parokiano ta presenta. Ta pidi pa ta presente pa 6:00 pm na Pro Catedral. Segun pastoor Andres, diasabra nan kier reuni cu movecion internacional mundial cu tin di resa rosario di hende homber. E resamento di rosario ta planifica pa tuma luga na Kapel di Alto Vista y ta mantene esaki eynan. Si tempo ta claria nan ta topa pa 5:00 pm, pero si tempo ta stroba nan tin un plan B. E plan B ta cu e ora lo reuni na mesun orario na misa di Noord. Ta invita hende homber pa yega Kapel di Alto Vista y e plan B ta misa di Noord.