I.L. Laboratorio Familiar awo ta acredita pa instancia Mericano

Actualmente ta na Aruba dos inspector for di e American Association for Laboratory Accreditation (A2LA). E obhetivo di nan bishita tabata e inspeccion di facilidad, personal y procedura na I.L. Laboratorio Familiar como parti di e proceso pa nan acreditacion conforme ISO 15189. Orguyosamente I.L. Laboratorio Familiar por anuncia di a cumpli di forma satisfactorio cu tur e rekisito y a obtene un biaha mas, e acreditacion renombra aki.

E ekipo di inspectornan ta consisti di Rosa Villanueva y Eric Reisdorf. E ultimo aki a duna di conoce cu e proceso di inspeccion ta uno masha riguroso y cu ta tuma entre cuater pa cinco dia pa completa. Durante e tempo aki ta inspeccion minuciosamente e menu completo di servicio cu e laboratorio ta ofrece pa e comunidad.

“Ta evalua e sistema di maneho di calidad, como tambe e areanan tecnico di e laboratorio. Nos ta sigura cu e laboratorio no solamente ta cumpli cu e standards, pero tambe cu e ta produci resultadonan di calidad halto y cu ta confiabel,” e inspector a splica.

Si en caso algo no ta bon, ta notifica e laboratorio inmediatamente di e deficiencia na e standard relaciona y nan mester implementa un analisis di origen di causa sigui pa accion pa corigi y preveni cu e incumplimento aki no ta ripiti den futuro. Esaki ta un parti importante di e proceso continua di mehora di calidad pa laboratorionan.

Villanueva ta e inspector hefe di e delegacion. El a relata cu A2LA tin miles di standards cu ta evalua den cada inspeccion y esakinan ta reparti den diferente area. Tin e parti pre analitico, analitico y post analitico. E parti analiticio ta consisti den e proceso pa tuma e muestra. Aki ta percura cu e personal ta mantene e regulacion y rekisitonan pa tuma e muestra, procesa e muestra y transporta e muestra pa e laboratorio.

E parti analitico ta esun den cual e inspectornan ta controla cu e persona ta entrena y ta competente pa analisa e muestra segun e metodonan di control di calidad pa garantisa un precision den e resultado na e standard di mas halto. Finalmente, e parti post analitico ta esun den cual ta controla cu tur e rapportnan cu ta manda pa dokter ta cumpli cu tur e rekisitonan pa loke ta trafa e factornan cu mester inclui, e referencia y balor. Tambe ta verifica e resultado ta refleha cu precision den e rapportnan aki.

I.L. Laboratorio Familiar ta hopi satisfecho di por a obtene e acreditacion ISO 15189 for di e American Association for Laboratory Accreditacion, garantisando asina e nivel mas halto di maneho, operacion y resultado na e clientenan di Aruba. Ta yama danki na su personal cu ta clave den e exito di e inspeccion y na mesun momento ta renoba nan compromiso di sigui brinda un servicio optimal.