Hulanda tin e cranch’i placa bon cera pa Aruba

Hulanda ta insisti cu mester tin un bon supervision financiero pa Aruba, prome cu pensa den sigui fia placa, sea na Hulanda of cualkier parti di mundo. Esaki ta loke cu Secretario di Estado pa Asuntonan di Reino Alexandra van Huffelen a declara na e portal NoticiaCla, durante un entrevista cu colega Tito Lacle.

Mirando e relacion financiero di Hulanda pa cu Aruba, Madre Patria ta keda para riba un Ley di Reino (Rijkswet) di control financiero pa por yega na un refinanciamento di e debe di Aruba. Pues cu mester yega na un acuerdo riba algun punto prome cu por yega na un scenario unda cu Hulanda ta refinancia e debe di Aruba.

“Esaki ta nifica cu nos ta desea un Rijkswet di Supervision Financiero, prome yega na refinanciamento di e debe y e ta forma parti di e pakete,” adina Alexandra van Huffelen a duna di conoce durante e entevista via Zoom.

El a bisa tambe cu Aruba por purba fia riba mercado internacional pero pa esaki mester di aprobacion di Conseho di Minister di Reino prome. Pero mirando e ‘rating’ di Aruba, esaki ta nifica cu lo haya prestamo pero na un interes halto. Ya caba agencianan financiero a cuestiona si Aruba tin un acuerdo cu Gobierno di Hulanda pa e debe di casi 1 biyon florin cu lo mester paga na october proximo. Pasobra cu e debe ey riba nos balans y cu un areglo di pago cu un quota halto, lo haci cu dificilmente Aruba lo haya prestamo. Pio cu si Hulanda nenga di aproba of den cierto forma, para garantia pa e fiansa.

Di e forma aki por deduci, cu tur trankilidad Gobierno di Hulanda a bay di acuerdo pa, loke Aruba a yama bari COHO fo’i mesa, pasobra nan tabata sa cu nan tin “un carta pisa bou nan manga di camisa”. Pasobra si no changa bo cu COHO ta changa bo bek via RAft.

E pregunta cardinal ta: Kico comunidad di Aruba mes ta pensa pa emiti e Ley di Reino pa permiti un supervision financiero na nivel di Reino Hulandes, mesun cos cu Corsou y Sint Maarten tin caba desde diesdos aña pasa. Ta conoci cu e dos forsanan politico mas grandi di nos pais, esta partido MEP y AVP nunca lo bay di acuerdo cu un semehante acuerdo pasobra e Minister di Finansa lo perde cierto autoridad y autonomia. Pero acaso nos por come autonomia? De facto, ta e mesun dos partidonan aki a hinca e pueblo aki den e situacion financiero di awe, un mas cu e otro. Si nos kier tin un bon cuido medico, enseñansa, husticia y pakete social, anto ta necesario pa por tin un bon maneho financiero. Desde aña 1986 nos nunca a logra, pues e chens cu awo si por…ta dudoso.

Bolbiendo bek na e combersacion cu e representante di Gobierno di Hulanda, el a sigura cu probablemente lo ta mas atractivo pa Aruba fia placa cerca Hulanda y asina yega na un palabracion cu Hulanda pa refinanciamento di e debe. Esey lo por nifica tambe den fia 100 y paga 100, sin interes. Elimina pago di interes caba lo yuda nos presupuesto masha tanto mes y lo duna Gobierno di Aruba un gran alivio y menos presion. Pero manera nos grandinan ta bisa, “mester muri pa por yega shelo”, pues sin e sacrificio ey lo no por yega na e tipo di prestamonan asina cu ningun parti di mundo ta disponibel pa paisnan cu tin un situacion financiero fragil manera esun di nos.

“Nos ta dispuesto pa haci esey pero cu un supervision financiero cu ta regla via di un Rijkswet”, segun Secretario di Estado Alexandra van Huffelen.
No mester lubida cu dia 10 di october e prestamo ta vence y prome cu esey mester yega na palabracion riba e refinanciamento.