Hulanda na Gabinete Wever-Croes: Bo no por bay shelo sin muri!

Aruba ta hungando cu candela door di a frustra creacion di e Rijkswet Aruba financieel Toezicht (RAft). For di un ‘dienstmededeling’ di Secretario di Estado, Alexandra van Huffelen na Tweede Kamer, por conclui cu Aruba por lubida riba refinanciamento di e fiansanan otorga pa Hulanda, si no para e resistencia contra e RAft, segun un articulo di Dossier Koninkrijkrelaties.

E proyecto di ley tabata na Parlamento di Hulanda y Aruba desde dia 9 di februari 2022. E preguntanan cu ambos a haci riba esaki na mei, ainda no a haya un contesta. Parlamento di Hulanda a cuminsa perde pasenshi y siman pasa a pidi Van Huffelen pa conta pa di dos biaha con cos ta. El a bisa cu “no ta posibel pa duna un contesta sustantivo n’e momento aki.”

“RAft t’e Ley di Reino di consenso. Esey ta nifica cu Aruba mester sostene e proposicion. Despues di e informenan emiti, Gobierno di Aruba a indica cu no tin consenso p’e proposicion entre e paisnan. N’e momento aki ainda ta discuti esaki cu Gobierno di Aruba, indicando cu e supervision financiero ta relaciona cu e refinanciamento di e prestamonan di Aruba a traves di un Ley di Reino (Rijkswet),” e Secretario di Estado a skirbi.

E referencia n’e refinanciamento di prestamo ta significativo. Dia 10 di october, Aruba mester paga e prestamo di likides di poco menos cu mil miyon di florin (1 biyon) cu Hulanda a fia nos na momento di e coronacrisis. Algun siman pasa, Prome Minister Evelyn Wever-Croes a anuncia cu lo tabatin un acuerdo di refinanciamento. E optimismo aki, husga p’e declaracion di Van Huffelen na Tweede Kamer, parce di tabata prematuro.

Porcierto, un memorandum oficial ta mustra cu Gobierno Hulandes aparentemente ta habri pa cambia e proyecto di ley: “Te asina leu, e discusionnan riba un Ley di Reino (Rijkswet) como un herment (necesario) p’e acuerdonan riba supervision financiero ainda no a caba.

Por lo tanto, ainda no ta cla con e proceso aki lo sigui encuanto un Rijkswet (RAft of un Rijkswet adapta) y e cronograma. Alexandra van Huffelen a priminti di informa Tweede Kamer riba e ‘stand van zaken’ y e planificacion spera asina cu e combersacion cu Aruba completa. E no a specifica un fecha riba esaki.

Ta papia aki di refinancia e debe cu Hulanda y ma mes momento pa Hulanda refinancia nos debe internacional cu 0% di interes. Tur esey por, pero si pasa e ley di RAft, cu Corsou y Sint Maarten tin caba desde 10-10-10, ta duna Gobierno di Hulanda mas autoridad pa supervisa nos maneho financiero. Di un banda Aruba no kier, pasobra politiconan ta mir’e den forma di perdida di autonomia, pero di otro banda kier fia si sin interes.