Hues ta haya polisnan culpabel di horta celular

E polisnan a haya castigo condicional awe di hues den Corte, aunke cu fiscal a pidi pa manda cera nan na KIA. A haya polis Tico de Mey culpabel di tres di e cuater acusacionnan den su contra, mientras cu George Dammers ta culpabel di “verduistering” di e celular. E dos polisnan a coy un celular cu polis tabatin den beslag cu a kita fo’i otro hende y a duna e sospechoso Juju Toppenberg pa por papia cu ne como testigo den un caso grandi di droga.

Contrario na demanda di fiscal, e castigo impone tabata completamente condicional. Hues a tene cuenta cu demasiado tempo a transcuri desde e sucedido. Tambe e impacto di e caso riba nan, famia y e echo cu informacion eroneo di nan a sali riba rednan social.

Corte a impone un castigo di 9 luna condicional pa Tico de Mey y di 6 luna condicional pa George Dammers. Ambos a haya un tempo di prueba di 2 aña. Nan tin dos siman pa apela, den caso cu no ta contento cu e veredicto. Mester menciona cu esaki ya e trayecto penal y cu e veredicto aki awo, Mando Policial lo mester atende cu e castigo disciplinario, cu por ta hasta nan retiro di trabou. Ambos ta trahando normal ainda, De Mey na Strandpolitie y Dammers como Grenspolitie na Aeropuerto.