Hues a declara doño di apartamento liber di acusacion di contrabanda di hende

Dalilah de Gamez a yora di alegria diahuebs mainta den Corte ora cu hues a declar’e liber di e acusacion di a coopera intencionalmente pa regla estadia na ilegal. A trata e caso aki algun siman atras. E ta menciona cu den e periodo di januari 2019 te cu 17 di juli 2021, a huur seis camber den nan cas y un apartamento den cura, pa algun tempo, na un grupo di persona stranhero. E camber- y apartamentonan tabata costa entre 400 y 600 florin pa luna.

E personanan en cuestion ta Peniche Garaban, kende ora cu a yega prome biaha, a keda algun dia atras. E di dos biaha cu el a bolbe Aruba el a pidi asilo. El a keda n’e cas di e acusado y a bay laga un debe atras di tres luna di huur. Tin J.F. Medina Barreno, Venezolano, cu tambe a yega na 2019. El a keda ilegal y a bay biba cerca Peniche Garaban. Durante pandemia ora cu el a perde su trabou, el a sali di e camber lagando tres luna di huur sin paga.

S.J. Quero, Venezolano, a yega na november 2019 pa traha. Despues di un periodo a pidi asilo politico. El a huur un camber hunto cu un amiga n’e adres na Pavia. M.A. Alvarado Gomez, Venezolano, a yega Aruba como turista dia 20 di januari 2020 y a haya un estadia di 5 dia. Despues cu e dianan a pasa, el a pidi un asilo politico. El a bay comparti camber cu Quero na Pavia. Tambe tin L.R. Davila de Diaz, di nacionalidad Venezolano, cu a yega Aruba cu su nieta di 8 aña. Nan a drenta como turista y mester a bay bek nan pais na comienso di april 2020, pero a keda atras. Na mei 2021 el a huur un camber na Pavia. Nunca el a bisa e doño cu e ta ilegal y tampoco e topico aki a bin dilanti den e combesacionnan. 

Fiscal a bisa cu por proba legal y convincentemente cu el a haci su mes culpabel na contrabanda di persona. Manera e acusacion ta bisa. E fiscal a insisti cu e acusado tabata na altura cu tur e hendenan tabata ilegal. Si e no tabata sa mes, e mester por a sospecha algo, esta cu e hendenan ta ilegal. Dunando e persona ilegal aki un luga pa keda, “bo a bay contra maneho di Gobierno pa loke ta admision di personanan stranhero, a mina nan autoridad.”

Abogado mr. Peter Mohamed a pidi pa absolve su cliente di e acusacionnan, pasobra no por papia cu el a hacie pa saca probecho, pero tampoco e tabata consciente of por a sospecha cu e personanan ta kedando aki ilegal. E tin un negoshi cu e ta huur apartamento y camber na prijs rasonabel.

Pa un relato mas amplio, lesa TREMPAN.