Hospital ta reacciona: Ta respeta privacidad di pashent

Hunta di Directiva di Horacio Oduber Hospital (HOH) a tuma nota di diferente articulo den medionan di comunicacion tocante e autopsia cu ta concerni un caso sumamente lamentabel. Un caso cu sigur tin un impacto grandi riba comunidad di Aruba y ta trece pregunta encuanto e sucedido.

“Manera ya a splica diferente medionan di comunicacion, HOH a sinta cu e famia pa duna informacion y tambe a facilita pa e autopsia por tuma luga. Den cuadro di privacidad di pashent y cliente, hospital no por duna mas informacion tocante e caso aki. Dr. Horacio E. Oduber Hospital ta enfatisa cu privacidad di nos pashent y clientenan ta sumamente importante y nos como dunado di cuido ta respeta esaki.

Regularmente pa medio di diferente comunicacion interno y presentacionnan ta enfoca riba e punto aki cerca nos trahadonan y alabes ta splica e consecuencianan si en caso no respeta privacidad di tur pashent y cliente”, asina Hospital a reacciona awe.

E reaccion aki a sali, probablemente, a sali awe despues cu Solo di Pueblo a cuestiona hospital, pasobra segun e corant, cu hospital lo a “lek” resultado di autopsia di Elida Arteaga. Ironia ta cu e corant tabata e unico cu a publica e noticia na un prome instante. El a cuestiona dicon 24ora.com no a publica nada, insinuando cu lo ta tapa pa polis of hospital. A pidi pa haci un autopsia y awo cu a cumpli, ta cuestiona con e resultado por a sali.