Hopi disgusto entre e trahadonan: Accion di protesta na cualkier momento den NV ELMAR

Trahadonan afilia na e tres sindicatonan, UEA, STA y ALVAST ta prepara pa bay den un accion di protesta dilanti e oficina principal situa den Wilhelminastraat. E trahadonan ta disgusta cu e director, Anthony Irausquin, den forma dictatorial a opta pa para tur negociacion pa un contracto colectivo di trabou (CAO) nobo. Como motibo el a hustifica e reto pa baha tarifa pa pueblo, pues cu awo no ta ora pa mishi cu salario y beneficio secundario di trahado. Pero e trahadonan no ta haya esey un motibo valido y ta considera esaki un conflicto laboral. 

Por lo menos dos sindicato, esta UEA y ALVAST a opta pa laga nan abogado manda carta pa gerencia di NV ELMAR pa protesta contra e posicion aki. Di nan banda, internamente, ta nota cu tur cos ta “business as usual” y cu e director ta biaha rond mundo cu Utilities NV of cu minister. Ora e mester a saca su Ford Mustang nobo nobo, e no a corda riba tarifa pa pueblo. Pero ora cu ta toca e homber chikito, awo si el a bira manera abogado di pueblo. 

Sindicato STA, maneha pa Diego de Cuba, tin miho relacion cu Gabinete Wever-Croes y a dicidi di pasa riba cabes di Anthony Irausquin y bay direct na doño di e circo, esta na Minister Glenbert Croes. El a haya reunion diamars mainta caba cu minister y e tin speransa cu e por convence e mandatario cu NV ELMAR no por tuma un posicion asina, pasobra e CAO a vence di aña pasa y e periodo alarga di un aña a pasa of ta pasando caba. Con Minister Glenbert Croes lo convence Ton Rojer di Utilities NV pa cambia e decision di Anthony Irausquin di NV ELMAR, no ta conoci ainda. 

A sinti cu por opta of tuma e postura di ‘fria cabes’ un rato, warda riba kico lo por bin afo di dicho reunion cu minister, como cu naturalmente e minister lo haci todo lo posibel pa evita un protesta. A canta prome cu ora riba un eventual accion di protesta, cu ta pone e director bou presion y riba sobreaviso di cualkier intencion cu tin y cu si ta asina lo no resulta mas.

Anthony Irausquin a tuma e posicion di director di NV ELMAR desde dia 1 di januari 2021. El a bira e prome director pa acepta e “Wever-Croes Norm” hayando un salario menos di tur e directornan prome cu ne. Pero el a haya un lista largo di exigencia cu Utilities Aruba kier pa e ehecuta, mayoria ta cambio di maneho y areglo interno cu lo no bay facil. E cultura den NV ELMAR ta diferente na locual el a custuma cu ne na Hospital, unda e tabata den posicion di “manager”. E ultimo director cu a purba cambia e structura den NV ELMAR, esta Ing. Robert Henriquez, a haya “golden handshake” y por a bay su cas. 

Ademas tin entendi cu lo a ricibi instruccion riba reduccion di tarifa di coriente, eski lo mester a drenta via un mail y basa riba e move strategico politico aki, cu a logra surpasa e reto aki y consecuentemente lo tin espacio e ora pa sigui delibera riba negosacion cu sindicato di trahado.

E empleadonan kier pa sigui negocia pasobra tin un draft riba mesa y partidonan no tabata mucho leu fo’i otro. A pidi si pa wanta cu e proceso di restructura e areglonan laboral y di e funcionnan por lo pronto. 

Diego de Cuba, presidente di sindicato STA, a bisa na augustus aña pasa cu e ta calcula cu e contracto aki lo drenta na vigor na 2023 si no ta prome. A informa e delegadonan e tempo ey den un reunion pafo di NV ELMAR cu di parti gerencia nan ta falta di suministra informacion necesario p’e negociacionnan cu mester tuma luga.

Un di e puntonan importante di e negociacion ta riba e compania Berenschot, cu ta yuda N.V. ELMAR riba e parti di reorganisacion, un structura salarial completamente nobo p’e trahadonan. Nan tabata bezig riba esaki pa basta tempo, segun e sindicalista. Conociendo e hendenan di Berenschot pa haci e trabou aki, p’e sindicato esaki no ta bon. E ta haya cu gerencia a trece padilanti locual e compania a bin cu ne, 70% dje empleadonan trahando den N.V. ELMAR ya nan lo ta den nan maximo caba.

Esey ta encera cu practicamente “bo ta morto”, segun e sindicalista. El a duna un ehempel cu un trahado tin 45 aña y e structura salarial di Berenschot ta bisa “bo tin 45 aña, pero e salario cu bo tin bo ta den bo maximo caba.” Tin e posibilidad cu el a pas’e caba, aunke nan no por baha e salario. Segun e sindicalista, e trahado por tin 45 aña y e mester struggle pa binti aña te dia e yega edad di pensioen cu e salario ey. Esey ta algo frustrante, e trahado no ta bay sinti ningun estimulo, e lo bay trabou e ora djis pa presenta.

Sindicato STA no por a acepta esaki y a splica Anthony Irausquin esey tambe. Na augustus 2022 a trece padilanti cu ora di bay negocia, nan ta puntra e compania cuanto placa tin pa negocia. Nan ta haci esey pa asina por negocia riba esey. Si compania bisa nan no tin nada presupuesta, esaki ta hopi straño. Ta drenta un negociacion di CAO y no tin nada presupuesta p’esaki, e sindicalista kier sa e ora kico ta negocia. Si e pega, e pega, si no pega, ya, pero ta cos cu ta pone trahado bay den accion. STA a trece esey padilanti n’e miembronan y splica riba e CAO p’e otro sindicato, di cual a saca afo cierto beneficio afo. STA na su turno ta bringando pa hinca nan bek aden.

Cu e posicion nobo awo e aña aki, gerencia ta bisa cu no kier ni negocia mes, corda pa tira awa den biña. A opta pa cera porta pa e sindicato, cu awo ta contesta cu accion di un banda y otro banda ta pasa riba cabes di Irausquin y bay direct na Minister di Energia, responsabel politicamente pa e maneho di Utilities, cu ta e doño di NV ELMAR. E trahadonan ta pendiente, sea UEA ta haya contesta di carta of STA ta yega na “Papa Dios” direct. Sindicato ALVAST ta den un otro posicion pasobra su miembronan no ta forma parti di e CAO sino cada un tin nan mesun IAO, cu ta un contract individual. Pero nan tambe ta pendiente mehoracion di salario y beneficio.