Hopi contratiempo pa mantene fontein

Director di DOW, ing. Marlon Croes a admiti cu nan ta confrontando basta dolor di cabes den mantencion di e fonteinnan den centro di ciudad. Actualmente tin 3 fontein den Playa, (1) Plaza Padu patras di Bestuurskantoor, (2) Plaza Daniel Leo, (3) situa entre Penha y La Moderna. 

FONTEIN PLAZA PADU

A vandalisa e ekipo di luz y sistema di cashi di coriente, consecuentemente e luznan no ta cende. Aworaki ta den proceso di haci mantencion grandi riba dje. A pidi piedranan nobo pa e fontein y trabounan a cuminsa di kita e piedranan daña cu tabatin prome. Lamentablemente durante e periodo di mantencion e contratista a bira malo un tempo cual a trece algun tardansa, pero e siman aki nan a reanuda trabou. Ta calcula pa dentro di un pa dos siman lo keda cla. Ademas, tin contratista atendiendo cu e cashi di coriente pa e luznan drenta den funcion bek. 

FONTEIN PLAZA DANIEL LEO

E fontein aki tabatin un problema mas grandi compara cu esun di Plaza Padu. Tabatin dos palma den baki na e fontein, cu durante ultimo añanan a crece y bira grandi. Consecuentemente, nan a scheur e muraya di e fontein, pues a transplanta e palmanan aki pa Bushiri. Asina por a cuminsa cu e trabounan di mantencion na e muraya di e fontein aki. Awor lo sigui cu drecha piedranan y tegels cu a daña pa cual a haci e pedido pa esakinan. Lamentablemente e piedranan cu mester pa e fontein aki no ta disponibel na Aruba, pero manera cu ricibi esakinan lo reanuda e trabou pa finalis’e prome cu fin di aña. Mester menciona cu e cashi coriente y e luznan ta bon, pues manera cu materialnan cu falta yega, lo finalisa e trabou pa fin di aña e fontein Plaza Daniel Leo ta den bon condicion. 

FONTEIN MEMEY PENHA Y LA MODERNA

A tuma nota cu tin basta molester na e fontein aki ora cu e ta den operacion vooral cu awa. Pa e motibo aki DOW a hacie ful bashi. E fontein ta den planificacion pa un mantencion grandi tuma luga den curso di 2023. Pero, considerando e situacion di molester, mester hiba discusion amplio den seno di DOW, cu gobierno y gremionan comercial, pa evalua futuro di e fontein aki y kico ta e miho manera pa atende cu ne. A haya oido di diferente angulo cu ta indica pa miho elimina e fontein, pa motibo di e molester y pues lo evalua kico ta mas miho.

Marlon Croes a expresa cu si elimina e fontein pa via di e molester, esaki kiermen cu ta “give in” den e desaroyo di caya grandi den su totalidad. E otro opcion ta pa drech’e y haci e trabounan necesario pa keda manten’e den bon condicion y trece e atributonan cu ta mehora caya grandi, por ehempel bon iluminacion, bon servicio di limpiesa, bon mantencion y mas wowo den caya, cu e ora ey lo por reduci e molester.