Hoben local a perde su bida den accidente di trafico na Colombia

Un accidente di trafico a caba cu e soño di un hoben cu recien a gradua como Veterinario. Un profesion cu desde chikito e tabata kier a eherce. 

Marilyn Cardona tabata un hoben local cu for di mucha caba tabatin su futuro planea. Un persona amante di bestia, semper a bisa cu e lo kier bira veterinario den futuro. 

EDUCACION

Marilyn a bishita scol basico Rosario College na Playa, sigui pa Maria College MAVO. Ora cu el a caba el a sigui cu su estudio na Colegio Arubano, cual el a caba exitosamente na 2015.

Na 2016, pa motibo di continuacion di su estudionan, el a bay biba na Colombia, pa asina ta un stap mas cerca di logra su soño, cu tabata pa bira un veterinario na Universidad Santa Rosa de Cabal, conoci como Unisarc, situa na Chinchiná, den e  departamento di Risaralda na Colombia. E departamento aki tin Pereira como capital.

El a sigui su estudionan di Medicina Veterinario cu exito y no mucho tempo atras, el a logra obtene su titulo universitario. Pero prome cu e bin bek cas, el a keda algun luna mas Colombia pa asina e caba di bende tur su cosnan. Cu hopi entusiasmo su famia aki na Aruba tabata e dia yega unda cu nan lo por ricibi Marilyn bek na cas, unda cu e lo a cuminsa cu e siguiente etapa na cas, cu su diploma como veterinario den saco. 

DESTINO A DICIDI OTRO

Diasabra merdia, Marilyn a subi su motorcycle Yamaha 125cc pa bay haci un diligencia, algo cu semper el a haci. Rib’e caminda di Belen pa Remolinos, banda di e bario di ‘La Argentina’, el a bay dal semi-frontal contra un Truck modelo Chevrolet FRR color blanco.  El a dal den e banda dilanti parti robes di e truck.  Despues di e impacto, e motorcycle a keda banda drechi di caminda benta, den un pida yerba.

Mesora a bati alarma y tanto polis como tambe personal di Rescate di Cuerpo di Bombero local a duna Marilyn e prome asistencia. Pero mirando e gravedad di e situacion, a dicidi na hib’e cu urgencia pa Hospital San Jose.

Pero como cu e golpinan y a dicidi na hibe cu urgencia pa Hospital San Jose.  Como cu e golpinan a ocasion trauma severo na su cerebro, eynan a dicidi pa hibe pa cuido mas specializa pa Hospital Universitario San Jorge na Pereira.  Sinembargo durante e traslado aki, el a fayece debi na e heridanan severo aki.  Asina Docter a constata morto di Marilyn Cardona, naci dia 22 di April 1996, pues tin 26 aña di edad.