Hoben deporta ta pidi Minister Rocco Tjon pa yud’e bolbe Aruba

Siman pasa Guarda nos Costa a detene e homber Cristian David Camargo Zapata di nacionalidad Colombiano. Durante un conferencia di prensa, abogado John Zara, kende ta representa Camargo Zapata, a trece dilanti cu e persona aki a biba mayoria di su bida na Aruba y a purba na diferente ocasion pa regla su papelnan pero sin exito. Esaki ta haci Cristian Camargo Zapata un persona indocumenta y segun nos leynan un persona asina por haya un multa pero no necesariamente mester deten’e sin mas pa un tempo largo. Den e caso di Camargo Zapata a detene pa casi seis luna largo mientras cu e tin derecho pa un permiso.

Na momento cu e caso a bay Corte, hues a informa cu por detene un persona indocumenta pa seis luna. Unabes e periodo aki a pasa, a pidi firma liber pa Camargo Zapata y a hasta haci pago pero asina mes a deporta e homber Colombiano. Loke ta haci e caso aki mas peculiar ta cu a deport’e sin niun maleta y cu solamente loke e tabatin bisti na e momento ey. 

Dos recherche a bula cu ne via Panama rumbo pa Medellin. Asina cu nan a yega, nan a dun’e 20 dollar y lag’e atras pa e coy su mesun rumbo. Den ultimo contacto cu Camargo Zapata riba diasabra, el a informa cu el a wordo bati tambe door di e recherchenan prome cu a lag’e pa su cuenta na Medellin.

Melvin Ras di GNC ta abusa di su poder

Cristian David Camargo Zapata no ta contento cu e forma con a trat’e y deport’e for di Aruba. Den un combersacion cu e redaccion di 24Ora.com, Camargo Zapata a splica cu Melvin Ras di Guarda Nos Costa ta haci mal uzo di su contactonan y influencia cu e tin. Segun Camargo Zapata, Melvin Ras a tuma su caso hopi personal y tabata constantemente riba dje pa e bay for di Aruba. Melvin Ras lo tin miedo cu e ta bay perde su caso contra dje ya cu Camargo Zapata lo tin un caso den corte dia 8 di februari proximo. Caso cu Camargo Zapata ta sigur cu e lo gana. Un tempo Melvin Ras a lag’e trankilo pero diabierna 3 di februari el a bolbe presenta y a uza forza bruto pa saca Camargo Zapata for di Aruba. 

Uza engaño pa sac’e for di GNC

E caso ta encera cu Camargo Zapata tabata bringa pa haya firma liber y tambe su concubinato. DIMAS a nenga e concubinato y e firma liber. Dios ta grandi y Camargo Zapata ta agradecido na e hendenan cu e tin ta yudando e y e ta kere cu esaki ta loke Melvin Ras lo a tende y tin miedo pa e sali di Guarda Nos Costa y gana su caso. Pa e motibo aki mes Ras lo a actua di un forma hopi bruto, sacando e for di Aruba. Camargo Zapata ta relata cu prome kier a sac’e for di Guarda Nos Costa bou engaño cu su abogado lo ta pafo ta ward’e. Micheal Mitch Perez ta un recherche di Guarda Nos Costa y e lo a bisa Camargo Zapata cu nan ta ward’e pafo otro banda pero ora a puntr’e ken ta warda otro banda, e recherche no por a contesta y a cuminsa gagia. Esaki a pone Camargo Zapata duda ya cu su abogado mes lo no a bis’e nada. 

Despues e recherche a bisa cu ta corte lo ta wardando riba dje, riba cual el a contesta e recherche cu esey no por ta berdad pasobra e tin un caso caba dia 8 di februari. El a bisa e recherche cu e lo warda riba infomacion di su abogado via telefoon pa asina traha un otro cita. Tur esaki tabata un engaño y nan a boei e y bay cu ne sin baña y cu solamente e paña cu e tabatin riba su curpa 

Recherchenan ta cumpli cu ordo cu nan a haya

Segun Camargo Zapata, e no ta e prome persona cu nan ta saca asina y ta hopi mas a wordo trata di e forma aki. Te unda cu e sa, Guarda Nos Costa no mag mishi cu personanan illegal y saca nan cu forza. Ora cu nan a hinc’e den bus, e recherche a bis’e cu el a tende cu e lo ta poco agresivo y e recherche a bis’e di antemano cu si e mester dal e, e lo no pifia dos biaha pa dal e bek. Camargo Zapata a haya esaki poco onbeschoft y el a rabia y a bisa e recherche cu si e no haya su jeans y kedsnan y hasta sin telefon nan kier a mand’e. Cu e por conta cu e lo haci un escandalo na aeropuerto y lo no laga nan subie den e avion. Si ta trat’e manera un terorista, e lo actua como tal tambe. El a puntra e recherche si at least por busca su jeans, kedsnan y telefon p’e. E no por keda sin comunicacion, sin baña y sin paña na Colombia. E recherchenan tabata bon hende y a yud’e te unda nan por y a bis’e ta un ordo nan a haya.

Melvin Ras no a sigui e proceduranan corecto di deportacion

Segun Camargo Zapata, e no ta kere cu e ordo aki a bin di Minister Rocco Tjon ya cu el a bin tende cu ta un tal Vincent tin di haber cu esaki y cu ta supuestamente Vincent y Ras a regla tur cos pa ora nan yega Panama, pa Migracion ricibi nan. Ora nan a yega aeropuerto el a puntra e recherchenan si ta den serio nan ta bay bah’e manera cu ta un terorista e ta dilanti tur hende di cual hopi di nan el a bay scol cu nan. Pero e recherchenan no a worry y a bah’e na aeropuerto. Ora el a baha el a keda wak Ras y a bis’e cu e no tin miedo di dje. Kisas esaki lo tabata palabranan un poco fuerte pero el a bisa esaki door di e impotencia cu e tabata sinti na e momento ey. E sa cu e por a sali liber pero Ras a actua cu su husticia den su man pa sac’e for di Aruba. Manera cu esaki no ta suficiente, Ras a fors’e dilanti tur turista presente, sabiendo cu e procedura pa deporta un hende ta cu bo ta yega aeropuerto, check in y bay straight Migracion y no mester pasa via e scanner. Melvin Ras kier a pon’e pasa berguensa dilanti tur e turistanan y lag’e pasa door di e scanner. Un persona na Migracion a bisa cu esaki no ta e procedura y kico nan ta haci eynan cu ne pia abou y hasta su jacket nan kier a kita. El bisa cu e no kier kita su paña y a puntranan pakico nan kier kita su paña y cu e no ta un terorista.

A sac’e manera un cacho for di Aruba

Camago Zapata a afirma cu loke su mama a bisa ta berdad y cu e tabatin un problema cu droga y cu ta hustamente pa esey nan a mand’e Colombia pa e por rehabilita. E tin tur su documentonan di e centro di rehabilitacion na Colombia si nan mester di nan. E no a custuma biba na Colombia y aunke nan a sac’e for di Aruba, e sa cu Dios lo trece bek na Aruba. Ora su mama a bay Guarda Nos Costa pa yudansa, nan a bis’e pa manda su yiu rehabilitacion numa pasobra e tin derecho riba esaki y tambe su firma liber y paspoort pasobra el a bay scol na Aruba. Tambe a bisa e mama cu ora e caba su rehabilitacion su mama por bin Guarda Nos Costa busca un carta of algo cu ta bisa cu el a bay Colombia riba su mesun responsabilidad. Ora cu nan a haci esey, no tabata por y Guarda Nos Costa no a yuda su mama y Camargo Zapata a hay’e ta warda 5 aña na Colombia. El a purba custuma na Colombia pero esaki no a logra ya cu su pais ta hopi violento y tin hopi criminalidad y el a custuma cu e cultura di Aruba.

Ta pidi ayudo di Minister Tjon y Minister Croes

Camargo Zapata ta haya inhusto tambe cu un persona cu a bay scol na Aruba y a haci su best pa siña nos idioma, cultura y historia ta sac’e manera un cacho for di e isla. E sa cu e no ta perfecto pero tur hende por comete erornan di cual nan ta arepenti y ta merece un second chance y esaki e kier wak kico Minister Rocco Tjon of Minister Glenbert Croes por haci pa yud’e. 

Camargo Zapata ta kere cu ora Melvin Ras di Guardo Nos Costa a haya sa cu e ta moviendo, el a actua contra dje. E tin cu remarca si cu e tabatin un telefon scondi den su cel. Den Guarda Nos Costa ta tres biaha pa siman so bo por papia cu bo sernan keri y con un hende cu tin caso pendiente den corte por bringa su caso si e tin asina poco tempo so cu e por haci yamada. E ta kere cu ta obra di Dios cu el a haya un telefon eyden pa asina comunica cu su hendenan pafo y por a drecha su cosnan pa keda liber. E tabata falta tiki pa logra esaki y e ta kere cu ta esaki Melvin Ras a haya sa y el a actua di e forma cu el a haci pa saca Camargo Zapata for di Aruba.

Scol y diplomanan di Aruba no ta reconoci na Colombia

El a haci diferente cos pa por bira legal. Via concubinato esaki no a logra. Na december 2021 el a haya problema cu e pareha y el a bay cera 3 dia y despues nan a mand’e Guarda Nos Costa. Asina mes el a keda purba pasobra el a bay scol na Aruba unda cu el a haci MAVO y el a bay EPI Administracion. Hunto cu su abogado el a dicidi di bay pa su firma liber y nan a regla y paga tur cos y riba esaki e tabata wardando un contesta positivo. DIMAS a bisa di lo acepta e verblijfsvergunning y e mes ta wak esaki como un chens pa e por drecha y e tin hende dispuesto pa firma p’e pa haya trabou. E tin bon referencia di trabou, entre otro como waiter y bartender, y el a traha na Papiamento Restaurant y tambe Peanuts pa menciona algun. 

Lastimamente Guarda nos Costa a sac’e for di Aruba y e no sa si ta gusta Melvin Ras no gusta Latino of si e ta algo personal contra su persona pasobra Ras gusta biaha bay Venezuela si pa keiro y tin famia Latino tambe. Camargo Zapata a finalisa bisando cu e ta spera cu gobierno por yud’e y cu e ta dispuesto pa haci un drugtest tur luna y cumpli cu tur loke nan pidie. Su mama tin mester di dje y el a laga un debe atras di como 5 mil dollar na debe cu abogado y e ta haya esaki inhusto pa su mama. Na Colombia e no por haya trabou pasobra ey no ta reconoce e diplomanan na Hulandes y e no tin hende pa traduci esakinan p’e.