Henter siman personal di KIA lo celebra cu actividad

Cuminsando dialuna, dia 3 di october y p’e resto di siman, e trahadonan di KIA ta celebra Siman di Cuidado di Preso cu diferente actividad y cu invitado di exterior cu a bin celebra hunto cu nan.

Segun Kim Maduro, cuidado di preso na KIA, pero alabes presidente di comision di trahado di prizon di Aruba, ta un programa cu ta bay te cu diadomingo cual ta como lo siguiente:

Dialuna anochi nan tabatin nan anochi di apertura cual ta “Men’s Cancer Awareness” y despues lo continua cu competencia di tiramento diamars, anochi nan tin Men’s Erger je Niet y volley. Diaranson nan tin rondleiding na KIA y anochi tin kickball na Noord, invitando asina henter e pueblo di Aruba pa bin wak e otro departamentonan di gobierno hunga contra otro.

Diahuebs nan fin funstacle riba Eagle Beach y anochi nan tin un Get-to-gether den Carnival Village.

Diabierna nan tin marchamento saliendo fo’i misa di Playa pasa den algun caya, pasa dilanti parlamento y caba na Renaissance.

Diasabra tin un gala parti p’e trahadonan di prizon y diadomingo ta termin’e cu un Pool Party. Actualmente nan tin invitado di Boneiro, Corsou, Sint Maarten y Surinam na Aruba, cerando un total di 110 persona cu tambe ta traha den prizon.

Rib’e anochi di apertura tabatin un total di exterior 110 persona, hunto cu esun di Aruba, a yega na 175 persona. Ora bo ta traha den un cuerpo asina, segun Maduro, mester ta mas uni cu otro den tur sentido. Semper tin ‘ups & down’, por discuti cu otro pero na final di dia mester por yega na un solucion y uni cu otro. Esey t’e meta di e anochi. Siña conoce e coleganan di otro pais y keda mas uni cu otro.