Hendrik Tevreden (MEP) na WEB: Blackout ta inaceptabel!

Diasabra anochi un biaha mas Aruba a experiencia un otro blackout. Parce cu no ta basta despues di e aumento di coriente pa ELMAR, e cobramento di algun dia extra di coriente riba recibo, schakel tur hende den un bracket mas halto. despues di tur esakinan, pa e pueblo di Aruba bolbe pasa den un blackout.

E negoshinan mediano y chikito ta pasando den duro ya caba cu aumento di coriente y pa nan perde cliente awo pa motibo di blackout simplemente ta bira dimas. “Un amigo a bisa mi ayera e ta sinta ta come den restaurant ora coriente a bay. Ta na unda nos ta bay”, Tevreden a bisa.  WEB ta un di e companianan cu mas a inverti den tecnologia, desde 2001 bini ariba, pero ta parce cu nos no ta mira e rindimento di e tecnologianan. Ta di comprende cu situacion mundial a causa aumento di HFO, nos sa tambe cu e guera Ucraina y Rusia tambe a aumenta e prijs di gas mundialmente. Pero esey no ta kita afo cu WEB y ELMAR tin di brinda un servicio optimal na nos pueblo. Niun di e efectonan externo aki mester tin efecto riba nan servicio pa pueblo. Blackout despues di tur e inversionnan cuantioso den tecnologia mester ta algo di pasado, y cu si e pasa mes, e no por ta na e cantidad aki cu nos a bin ta experienciando.

Durante tratamento di presupuesto dia 7 november 2022 ultimo, Tevreden a exigi un investigacion den e casonan aki. E kier sa kico ta e rason di e blackoutnan y con ta bay evita mas den futuro. No por ta asina cu e profesionalnan den WEB ta keha riba tur krenchi cos y nos cuidadanonan no por reclama. Ta bastante preguntanan e parlamentario a ricibi di e  cuidadanonan y nan kier un fecha y decision ariba un investigacion den e compania estatal pa caba. Di parti di Fraccion di MEP nos ta haya cu a yega ora pa minister atende e caso aki cu man duro pasobra e ta perhudicando nos hendenan y specialmente esunnan cu negoshi chikito y mediano. Mescos cu mester paga WEB y ELMAR tur fin di luna sino ta corta servicio, mescos nan tin di brinda servicio na esnan cu ta paga.

Por ultimo tocante e bracket y cobransa halto, Tevreden kier pa ELMAR resolve e asunto ey di otro forma. Berdad ELMAR a duna un areglo di pago pa esnan cu a haya un cobransa mas halto pa motibo di e dianan extra cu a conta. ELMAR a admiti cu esey ta un eror di nan parti y cu pa e motibo ey entre otro ta brinda areglo di pago riba e suma extra cu a bini riba e cobransa. 

Pero Tevreden kier pa Elmar mira cu si e suma extra ey ta wordo cobra riba e prijs di e bracket mas halto o prijs di e bracket mas abou. Segun mi pensamento e tin di wordo cobra den esun di mas abou di cual e cliente ta custumbra di haya su recibo y no esun mas halto cual ta pa motibo di ELMAR su dianan extra conta a laga e recibo subi asina tanto.