Heart-Centered Leadership Foundation a organisa sesion pa engrandece capacidad di boluntario

Heart-Centered Leadership Foundation (HCLF) ta ofrece diferente actividad pa hoben, unda e meta ta pa empodera e hobennan pa descubri ken nan ta, kico nan habilidadnan ta y kico nan kier logra. Un manera cu HCLF ta yega na e meta aki ta cu sosten di diferente pool di boluntario cu ta yuda den diferente manera.

Un di e pool di boluntario ta e ‘Heart-Centered Impact Coaches’ (HCIC), hoben adulto cu ta traha di cerca cu e hobennan durante HCLF su actividadnan pa hoben como ‘peer coach’. Ademas di tayer y training pa prepara nan den rol como boluntario, recien HCLF a brinda dos sesion pa engrandece e capacidad personal y profesional. E prome actividad tabata un ‘capacity building’, sigui pa un ‘Mock Impact Café.’

E boluntarionan a expresa un necesidad pa sigui desaroya nan habilidadnan pa facilita e procesonan den grupo, particularmente con pa maneha cu emocion y comportacion di e hobennan. Como un HCIC, e boluntario ta rekeri un actitud positivo, unda ta demostra compasion pa sostene, scucha y compronde e hobennan, cual no ta un tarea facil. E rol di HCIC tambe kiermen cu e boluntario tin biaha tambe mester di sosten pa procesa nan mesun emocion y sentimento durante y despues di e actividadnan. Pa e dos puntonan aki, den e evaluacionnan HCIC a indica interes pa ricibi mas tecnica pa mehora nan habilidad di guia e procesonan den grupo.

Pa acomoda e necesidadnan di HCIC, HCLF a prepara e prome Capacity Building training cual a consisti di dos sesion. E prome sesion tabata facilita door di Teodora Goloiu, un psicologo clinico cu ta specialisa den terapia cognitivo individual y den grupo. Goloiu a brinda un sesion interactivo riba topico ‘con pa maneha emocion como un peer coach’. E di dos sesion tabata un presentacion di Efraim Suurendok tocante ‘Codigo di Proteccion’.

Goloiu a haci un inventario di e preocupacionnan cu e boluntarionan tin y a curasha HCIC pa pensa conhuntamente riba e strategianan cu nan por uza pa resolve e retonan cu nan ta experenciando. Pa compliment e strategianan traha, Goloiu a brinda tips y rutina cu HCIC por uza pa procesa y regula nan emocionnan durante y despues di un actividad.

Den e di dos sesion Suurendonk a presenta e protocolnan cu ta uza ora tin sospecho di abuso di mucha. Durante e sesion HCIC a ricibi informacion breve riba con pa ripara e señalnan cu por indica c’un hoben por ta den un situacion di peliger pa nan mes of otro, y cual ta e pasonan apropia cu ta wordo uza pa maneha e circunstancia profesionalmente.

Despues di e Capacity Building, a organisa un teambuilding den forma di un Mock Impact Café. Impact Café ta un actividad di hoben cu HCLF a ofrece na scolnan secundario e ultimo aña, unda HCIC ta guia e proceso di combersacion den forma di grupo. E ‘mock’ Impact Café a actua como oportunidad pa e boluntario HCIC refresca nan conocemento y sigui traha riba nan habilidad pa guia y asisti combersacion den forma di grupo. Tambe practica con pa haci uzo di empatia autentico y scuchamento activo. E Capacity Building y e sesion di Teambuilding Mock Impact Café a yuda sostene e boluntarionan pa sinti mas fuerte den nan habilidadnan personal y profesional durante diferente actividad pa hoben, entre nan Impact Cafés cual recien a culmina exitosamente.

Si ta interesa di siña mas con pa cuminsa e trayecto di training como boluntario pa bira un Heart-Centered Impact Coach por bishita HCLF su website www.hclfaruba.org/hcic of por manda un mensahe di whatsapp na 5841211.