Haci aviacion mas sostenibel na un costo mas abou

Conferencia Dutch Caribbean Cooperation of Airports

Dialuna a tuma luga e apertura di e prome evento internacional di transporte aereo sostenibel, organisa pa Dutch Caribbean Cooperation of Airports’s, A Flight to the Future, na Hyatt Regency Resort Spa & Casino Aruba.

PROME AVION ELECTRICO

Esaki tabata e prome biaha cu Aruba a logra trece un avion electrico den Caribe y esaki ta marca historia pa e islanan aki. Angeline Flemming, Director Health Safety & Sustainability na Aruba Airport Authority y tambe Consehero di Dutch Caribbean Cooperation of Airports, a sigui bisa cu e islanan den Caribe ta ideal pa haci transporte mas sostenibel. E distancianan ta mas cortico, tin solo y biento na abundancia rib’e islanan cu por haci cu por crea electricidad na un manera mas sostenibel.

E avion electrico a bin Aruba pa prome biaha dos siman pasa y despues di algun test, entre otro e baterianan di e avion. E siman aki a cuminsa haci e testnan di prueba y esaki a culmina diadomingo cu e prome vuelo comercial di e avion. P’aworaki, e avion por bula solamente riba Aruba, pa cual a haci un trip rond di e isla y diadomingo Minister di Transporte, Integridad, Naturalesa y Asuntonan di Adulto Mayor Ursell Arends, a pasa cu e avion rond di Aruba. Su capacidad actual ta 30 minuut di vuelo. Mas cu e tecnologia desaroya su mes, ta spera cu e vuelonan por ta mas largo.

Henter e siman aki, tin varios orador di casi tur pais di mundo, tin participantenan cu a bin for di diferente parti di mundo, pa papia riba e tema, riba aviacion sostenibel, con pa hacie mas sostenibel. Con pa hacie posibel pa e hendenan por biaha, vooral na distancia cortico na un miho manera, cu no ta e aviacion tradicional cu ta basa riba fossil fuel.

ORADOR INVITA

Un di e oradornan invita pa e siman aki ta Jorge Rosillo di Corporación América y CEO di Cargo Terminal of Ecuador, TCE and the Galapagos Ecological Airport, cu ta e prome aeropuerto ecologico di mundo. El a elabora riba e echo di purba uni tur e aeropuertonan, specialmente esunnan den Caribe Hulandes, pa implementa e medidanan di sostenibilidad. Un decada atras, el a implementa algun di e medidanan aki y e tabata kier a comparti e experiencia aki cu e participantenan, den aplicacion di medidanan di sostenibilidad na momento di maneha un aeropuerto.

Esaki tabata Rosillo su prome biaha riba un avion electrico y si el a yega di wak un avion electrico bula y asina haya su acreditacion door di e agencia IASA na Europa. Pero e aeropuerto ecologico tabata e prome di su sorto na mundo. Pa cinco aña caba, Galapogos Ecological Airport ta funciona ‘carbon neutro’. A aplica diferente medida den e aeropuerto pa purba reduci e emisionnan di carbon den aire y tambe purba participa hunto cu e comunidad y e medio ambiente sin perhudica e medio ambiente.

VISION DI MINISTERIO DI TURISMO

Minister di Turismo, Dangui Oduber tambe tabata invita n’e conferencia ‘A flight to the Future’, unda cu lo comparti informacion cu tur e participantenan di e conferencia aki. E vision cu Ministerio di Turismo tin, e vision cu Aruba tin pa cu sostenibilidad pa e ‘electric flying’. Pa prome biaha den historia, un avion electrico ta bula na Aruba y e vision cu Gobierno tin ta den cuadro d sostenibilidad pa tin e avionnan electrico aki disponibel pa den mas o menos 3 aña, bula entre Aruba, Boneiro y Corsou como tambe St. Maarten.

Un biaha mas, Aruba ta posiciona su mes como lider, como visionario pa promove esaki. Tur hende por corda con un decada pasa tabata papia di autonan electrico y awendia tur marca di auto ta ofrece auto electrico. E siguiente paso ta ‘electric flying’ y aworaki, Aruba a posiciona su mes lider pa promove ‘electric flying’, pa asina baha e costo di biaha entre e islanan ABC.

Mas aleu, Minister Oduber a bisa cu un ticket pa Corsou y Boneiro, ta costa casi e mesun hopi c’un ticket Aruba – Miami. Esaki ta hacie hopi caro y e conectividad ta trece hopi reto cu ne y cu e vision di Gobierno tin, ta pa mehora e conectividad y mas ainda reduci e prijs di un pasashi entre Aruba cu Corsou y Boneiro. Lo mas importante cu tur otro cos, di haci e biaha hopi mas sostenibel. Ta p’esey a organisa e conferencia aki.

Pero lo mas importante di e conferencia ta cu lo firma un Memorandum of Understanding of Understanding (MOU) entre Aruba, Corsou, Boneiro y St. Maarten, pa mehora e conectividad, 2. Haci uzo di Biometrics pa check in ora di biaha entre e islanan y tambe percura pa uza e avionnan electrico, entre e islanan. N’e momentonan aki, ya caba ta desaroyando e prome avion electrico pa pasahero.

E avion cu a haci e vuelo di prueba ta carga solamente dos pasahero. Pero e avion electrico den desaroyo ta avionnan cu ta carga entre ocho cu diesdos pasahero. E avionnan aki lo por ta disponibel pa aki tres pa cuater aña y Aruba ta bay ta e prome den ofrece e avion di pasahero electrico. Esaki ta e vision di Ministerio di Turismo tin.

Mescos cu a lansa e Aruba Health App, cu a maneha e programa di test y vacuna, durante e pandemia. Mescos cu a lansa e proyecto Aruba Happy One Pass, cual lo uza biometrics pa uza un pre-clearance p’e turistanan Mericano pa tin un experencia di biahe sin problema alguno.