Habitantenan di Matadera muriendo di holo stinki y toxico di dump ilegal

Pa varios dia, e habitantenan di tanto Matadera, Tanki Flip, Tanki Leendert, Shaba, Boegoeroei te na Bubali, Washington y e area di Palm Beach entre otro , por a sinti molester di huma cu a bin di e dump ilegal na Matadera. Un di su habitantenan sumamente preocupa ta Ramon Kersjes cu a vocifera su malcontento p’e situacion cu ta reinando den su bario.

E situacion sigur ta uno inhumano. El a conta cu algun siman pasa nan a experencia un holo hopi toxico. A pega candela cerca di Matadera, cual tin un dump ilegal. Casi tur dia y anochi, e habitantenan ta haya huma toxico y no por hala rosea.

E habitantenan cu tin cas traha ey, no por disfruta di e paz y trankilidad, ni por sinta pafo. Diamars mainta, Ramon a lanta cu huma toxico den su cas. E tin tur su portanan cera. E ta simplemente un problema hopi grandi. Tambe e hendenan ta experencia esaki den diferente bario. E ta un problema masha grandi pa salud di hende di Aruba.

Ramon ta sigui splica cu e ta pensa cu e problema aki tin algun siman. E mes no sa di e otro hendenan si nan a sinti esaki pa mas tempo. Pero di su banda, a experencia esaki pa algun siman caba. E ta un huma toxico.  E ta pensa cu tin hende ta pega taira of articulo toxico na candela. Ta algo hopi sushi.

Esaki sigur a pone e problema aki na atencion di Gobierno. A yama City Inspector, a yama tambe Dienst Milieu & Natuur. A entrega keho na DVG tambe pasobra esaki a bira un problema di salud. A bisa Ramon cu ta bezig cu esaki pero mester di mas presion, segun Ramon.

Por mira e website di gobierno cu nan ta bezig cu sostenibilidad di Aruba y cu nan ta bezig ta adresa e dumpnan ilegal, pero Ramon mes no ta mira nada. Ta un problema hopi grandi, el a ripiti.

UN PROBLEMA ALARMANTE

E problema aki ta alarmante, ya cu tin hopi mucha ta hunga rond. E no ta algo bon pa nan. E mes tin problema cu halamento di rosea, djis imagina e muchanan cu ta hunga pafo casi tur dia. Tambe tin cu tene cuenta cu e hendenan grandi. E huma toxico aki no ta bon pa ningun hende.

Parti anochi e influencia ta mas grandi, el a splica. Te asina leu ta pega e candela parti anochi. Normalmente ta parti den dia, pero mirando cu a bin tira bista y awo nan ta djis cende candela parti anochi.

BARIO PENDIENTE DI RESULTADO

Ramon ta spera cu nan haya un contesta pronto di parti di gobierno y no sa cuanto tempo nan tin mester. Tur dia ta un dia di mas p’e huma toxico. Esaki ta trata e salud di Aruba. A manda keho aki via Fixi siman pasa y mas hende a pone nan keho via Fixi tambe. Dienst Milieu a laga sa cu nan a haya e keho di e habitantenan for di un luna pasa y ta bezig cu esaki. Nan a laga sa cu ta algo hopi sensitivo y no ta facil. Ta compronde cu nan ta bezig cu esaki, pero mester pone mas presion di e instancianan pero tambe di gobierno pa por soluciona e problema aki, cu ta afecta salud di no solamente di e habitantenan di Matadera, pero di Aruba en general.