Guido Gomez Masara: E diaspora ta un potencial electoral evidente pa politica Dominicano

Diaranson a tene un reunion cu e diaspora Dominicano, residencia na Aruba, tocante e cambionan politico c u ta tuma luga na Republica Dominicana. Pa cu e evento aki, tabata t’ey directamente for di Republica Dominicana, e politico Guido Gomez Masara.

El a bin Aruba specialmente pa asina drenta den contacto cu e colonia Dominicano na Aruba. Pa Gomez Masara, e diaspora ta importante. No solamente pasobra cu nan ta representa e dignidad di e Dominicanidad pafo di Republica Dominicana, sino tambe pasobra cu riba tereno electoral, nan tin un representacion importante. N’e ultimo proceso electoral, e diaspora Dominicano na Aruba no tabata por a vota, pa motibo di e pandemia di Covid-19. Pero e potencial electoral di e comunidad Dominicano ta evidente, pa cual motibo Gomez Masara ta na Aruba p’asina combersa cu nan riba diferente topico di actualidad y asina crea un contacto mas cercano.

E diaspora Dominicano di un manera of otro ta construyendo un Dominicanidad na distancia y mester incorpora esaki na e politica publico for di Republica Dominicana. No solamente for di un consulado, pero tambe pa fortalece e mecanismonan di representacion, di comercio ya cu e ta un manera interesante pa sigui construi e brug entre Republica Dominicana y e diaspora.

Hopi di e Dominicanonan a yega Aruba, a bin pa busca un miho futuro. Sea ta pa motibonan personal, laboral of familiar. Pero den e transcurso di añanan, e diaspora a sigui crece, nan no solamente a bin establece nan mes na Aruba, pero tambe a integra nan mes den e poblacion local.

Sigur di parti di e pueblo Dominicano, Guido Gomez Masara a manda palabra di gradicimento n’e pueblo di Aruba pa e ricibi e Dominicanonan cu a bin establece nan mes na Aruba y cu a haci di Aruba nan cas leu for di cas.