Grupo di trahado disgusta cu a kita nan durante nan “proeftijd”

Na Cmart grupo di trahado ta disgusta cu diabierna nan a haya sa cu nan ta kita fo’i trabou den nan proeftijd. Nan ta di pensamento cu a kita nan fo’i trabou inhustamente. A kita riba un solo dia mas di binti trahado.

Lilian van der Linden, ex-trahado di Cmart, a splica cu diabierna atardi a haya informacion cu ta kita nan. El a splica cu a yama nan ariba pa bisa nan cu diabierna tabata nan ultimo dia y pa presenta dialuna na Layex Building, y entrega e uniformnan. Pa nan esaki tabata un sorpresa, pasobra e supermercado no a habri ainda y ya a kita nan.

“Supuestamente nan a bisa nos no ta funciona p’e trabou aki”, segun van der Linden. E trabou mes no a cuminsa ainda, pasobra nan tabata haci shelf limpi, haci e freezer, haci tur cos limpi. Tambe nan tabata bezig pa yena e shelfnan cu producto, no tin producto pa nan traha. No ta tur hende tabata trahando, pasobra e grupo ta asina grandi.

KITA DEN PROEFTIJD

Den ley laboral tin dos luna di proeftijd y den e tempo aki e dunado di trabou por kita un persona. Segun van der Linden, nan no sa di esaki. Pero cu den nan contract ta poni cu no ta kita nan asina no mas. Tin varios aviso, depende di un persona su funcion nan por cambia esaki, pero depende di tur otro cos tambe, el a indica.

Gissette Quant, ex-trahado di Cmart, a indica cu nan tabata tin e trahadonan manera nan ta den prizon. El a sigui splica cu nan no tabata kier pa hende sinta, nan no tabata tin awa friu pa e trahadonan, no por a uza telefon aunke e luga no a habri ainda.

E storemanager no tin e amabilidad pa papia cu e trahadonan, pero realidad ta cu ningun tabatin manera. “Tur supervisor y manager, bo wak nan bon, nan a tuma nan, pero nan no tin e funcion eynan pa hacie. Nan ta purba haci nan trabou, pero nan mes no tin e carisma of conocemento di maneha un departamento”, segun Quant.