Grupo Contra Tubo di Gas: No ta contra di e proyecto di LNG pero no kier p’e pasa dilanti nan cas

Ultimamente ta den noticia e asunto di cambio di azeta crudo diki (heavy fuel oil) pa gas likido (LNG) pa WEB Aruba N.V. por usa pa crea energia y produci coriente pa N.V. ELMAR Aruba. LNG lo ta miho pa salud di hende, medio ambiente y lo por reduci e prijs di awa y coriente.

Un grupo di habitante cu ta yama nan mes Grupo Contra Tubo di Gas (CTG) no kier tubonan di LNG pasa den zona residencial di Aruba. Diamars e grupo di habitantenan preocupa di Zeewijk, Cura Cabay, Savaneta, Pos Chikito, Spaans Lagoen y Balashi a tene un rueda di prensa, pa manifesta nan preocupacion pa motibo di cu anteriormente Eagle LNG a papia di core un tubo di gas riba tera for di refineria RDA pa WEB Aruba N.V. riba e mesun ruta cu e 3 tubonan actual ta core. 

Aurelia Croes, habitante di Savaneta y miembro di e grupo a bisa cu nan a bishita varios di e sesionnan di informacion, pero cu na final di dia toch nan a keda cu hopi inkietud cu e informacion cu nan tin. Y u nan a logra di haya, pa cual nan a organisa nan mes pa vocifera cu nan no kier pa e tubonan di LNG Gas pasa den e areanan habita. 

Anteriormente Eagle LNG a papia di core un tubo di gas riba tera for di refineria RDA pa WEB Aruba N.V. riba e mesun ruta cu e 3 tubonan actual ta core. E plan aki a cambia y awo Eagle LNG kier coba un tunnel pa pasa e tubo di gas bou tera. Den algun luga e intencion ta pa coba e caminda dilanti bo cas pa pasa e tubo. Eagle LNG ta bisa cu e proceso aki ta hopi sigur, cu e no lo trece risico pa e habitantenan y nan cas.

Pero for di informacionnan ricibi y cu nos a busca riba internet ta sali afo cu e coremento di tubo di gas bou tera tin bastante risico envolvi. E tubo cu lo core for di refineria pa WEB Aruba N.V. lo ta un tubo di transmision di gas cu ta bou di hopi presion. E presion ta necesario pa WEB por mantene su ekiponan den

funcion continuo.

Mas aleu, Croes a bisa cu nan ta hopi preocupa pa nan salud mental, ya cu e caminda cu Eagle LNG kier pasa e tubonan di gas, ta den un area densamente habita. For di Zeewijk bin abou ta papia di supermarket, school, cas, restaurant, Maris Stella, Mariniers Kazerne, misa, etc. Ful e area di Savaneta ta den desaroyo di turismo, nos unico pilar economico. Pa e grupo, e decision aki no ta esun di miho pa pone tur esaki den risico, siendo cu tin otro opcion.

RECOLECTA FIRMA

Croes a bisa cu nan a cuminsa primeramente pa reorganisa nan mes, busca informacion, busca conseho. E siguiente stap ta pa cuminsa recolecta firma cerca e hendenan den bario. Lo splica kico ta e riesgo- y temornan. E firma recolecta ta pa vocifera nan preocupacion cerca Gobierno di Aruba y Eagle LNG. Nan no ta contra di e proyecto, tur ta sinti e efecto di e prijsnan di awa y coriente, nan kier pa Eagle LNG trece e proyecto Aruba, simplemente nan no kier e den nan cura di cas.

Un otro ciudadano preocupa, tabata Carmen Tromp, un pensionado y habitante di Spaans Lagoen. El a sigui bisa cu nan tin informacion cu Eagle LNG tin intencion di pasa tubo di gas bou di e caminda dilanti di Colegio Santa Famia. Esaki ta core for di e refineria te cu WEB.

Pero den pasado WEB Aruba N.V. a traha un plan pa uzo di LNG. Un investigacion haci na 2014, pa wak si por cambia di heavy fuel oil pa LNG. e proyecto aki tabata basta avansa, unda cu nan 2018/2019 nan a tene sesionnan di informacion riba e proyecto aki. A haya un sitio adecua na Barcadera, di e tanki cu ta bay warda e gas, di pone e tanki pa e gas banda di WEB Aruba N.V. mes na Barcadera. 

Lo a amplia waf di Barcadera pa e barconan di LNG por mara eynan y transporta e gas via tubo pa e tanki. WEB Aruba N.V. hasta a duna sesionnan di informacion (roadshows) den 2018 y 2019, pero lamentabelmente e plan aki a keda cancela den februari 2021. Tur cos ta keda enfoka den un solo area, tur ta keda hunto. Pero pa un of otro motibo e proyecto aki no a sigui.