Grant Thornton Aruba a organisa sesion tocante desaroyo sostenibel

Grant Thornton Aruba a organisa un sesion caminda a trata e topico di sostenibilidad y a invita algun director di compania y organisacion envolvi cu sostenibilidad.

E sesion aki a conta cu presentacion di Esther Wolfs, partner di Grant Thornton Hulanda, el a splica durante e mainta aki a papia tocante e transicion pa sostenibilidad na Europa. Cua ta e tendencianan na Europa cu lo por tin impacto riba Aruba tambe. A elabora ariba  e motibo cu tin urgencia pa tuma un paso asina importante. Wolfs a duna ehempel cu e mercado ta den un cambio constante y cada bes ta bin deseo y rekisito pa haci negoshi pero tambe pa opera di un manera mas sostenibel. 

Wolfs a continua splicando cu e personanan cu tabata presente durante e sesion ‘ki tabata un grupo basta interesante. Entre e grupo tabatin representante di diferente area manera por ehempel A.T.A., D.N.M, Banco Central, Fundacion Parke Nacional y Ministerio di Desaroyo Sostenibel. Asina por wak riba e cierto risico cu tin den nan portfolio financiero. 

Edsel Lopez, partner di Managing Partner Grant Thornton Aruba & Bonaire, a comenta cu Grant Thornton Aruba conhuntamente cu Boneiro tin un acuerdo cu Grant Thornton di Hulanda den cuadro cu kier enfoca riba un conscientisacion riba desaroyo sostenibel. Asina kier pa comunidad di Aruba sa cu nan ta den e mercado pa por yuda compania y NGO’s logra nan meta riba e tereno di sostenibilidad. 

Lopez a sigui splica cu e mainta tabata hopi placentero y alabes tabatin discusion di varios topico manera turismo y con ta anda cu naturalesa. Grant Thornton Aruba ta  enfoca riba diferente sesion informativo. Conhuntamente cu nan partner, Grant Thornton na Hulanda, nan tin e meta pa sigui crea conscientisacion pa loke ta traha sostenibilidad mirando cu e ta un mercado interesante cu Aruba por saca probecho di dje. Locual a resalta ta cu tur hende presente tin preocupacion pa loke ta trata e SDG’s, y tur hende tin ambicion pa cuida naturalesa. Ta importante pa organisacion nan traha hunto pa asina hisa e nivel di nos pais mas halto ora ta trate entre otro sostenibilidad.

Jacco Vroegop, director di Hospital, tambe tabata un invitado e mainta aki. Vroegop a cuminsa na bisa cu e grupo cu tabata presenta tin hopi conocemento y deseo. Conhuntamente ta spera cu hunto por traha na bienestar di comunidad di Aruba. Algo importante, segun Vroegop, ta cu hunto por traha pa un mundo miho. 

Di parti di Directie Natuur en Milieu, Gisbert Boekhoudt, director di e departamento a comenta cu parti di nan trabou ta pa naturalesa haya su debido atencion. E presentacion aki a trata riba con e companianan ta enfoca riba sostenibilidad, esaki lo yuda e trabou cu nan ta haciendo caba. 

Pa mas informacion tocante desaroyo sostenibel y e contribuicion di Grant Thornton Aruba pa cu e esaki, por bishita nos website https://www.grantthornton.aw/service/advisory/sustainability-services/ of sigui nos riba nos pagina nan social.