Gobierno ta cumpliendo: Aruba no a haya “aanwijzing”

“Conseho di Minister di Reino Hulandes a delibera awe riba e conseho di Colegio Arubano di Supervision Financiero (CAft) pa duna Aruba un instruccion (aanwijzing). Conseho di Minister di Reino a dicidi pa no duna dicho instruccion. Motibo principal pa esaki ta pasobra Aruba a haci cambio den presupuesto 2022, pa cual ta cumpli cu varios rekisito, loke CAft ta considera positivo. Cu e realidad aki riba mesa, no tin necesidad mas pa duna Aruba un aanwijzing”, asina Secretario di Estado pa Relacionnan den Reino y Digitalisacion, Alexandra van Huffelen, a anuncia un rato pasa pafo di Binnenhof na Den Haag. Awe Conseho di Minister di Reino Hulandes a reuni, den cual e Minister Plenipotenciario di Aruba, Coraou y Sint Maarten tambe ta atende y ta participa activamente den dje.

Pafo di e edificio a nota hopi atencion di medionan di comunicacion di Aruba, Corsou y Sint Maarten pa e reunion di awe. Mayoria ta medionan di comunicacion estableci na Hulanda, mientras cu otronan a bula for di Aruba pa cubri e reunion importante aki.

Den un carta fecha dia 10 di juni 2022, College Aruba financieel toezicht (CAft) a conseha Gobierno di Hulanda pa duna Aruba un “aanwijzing” debi cu no ta cumpli cu recomendacionnan pa por mehora finansa publico. E tempo ey a menciona cu a haci 13 recomendacion na Minister di Finansa, mr. Xiomara Maduro, pero cu a cumpli cu solamente un di e recomendacionnan haci. CAft ta referi na un tendencia negativo di Aruba pa sistematicamente no cumpli cu nan recomendacionnan. Es mas, Gobierno di Aruba a firma un protocol cu Hulanda riba mehoracion di finansa publico pero tampoco ta cumpli cu deadline y pio cu recomendacionnan.

E secretario di estado a subraya si, cu e obhetivo principal di CAft ta pa mehora finansa publico na Aruba y pone na ordo bek. Y esey ta di gran balor pa tur hende di Aruba. “Pasobra si bo tin hopi debe, ta stroba bo pa inverti den enseñansa, den combati pobresa y pa mehora salubridad publico”, di acuerdo cu Alexandra van Huffelen.

Punto di mehoracion

Durante e reunion di Conseho di Minister di Reino Hulandes, a resumi tambe varios punto di mehoracion. A tene cuenta cu ta masha poco por haci mas den presupuesto 2022, pasobra aña ta cabando caba. “Pero nos a papia hopi si riba presupuesto 2023, den cual Hulanda kier mira ehecucion di reformanan, baha debe drasticamente y pa sigura cu tin un surplus den e presupuesto (mas entrada cu debe). Hulanda kier pa Gabinete Wever-Croes crea pa espacio pa por inverti den desaroyonan nobo. Pasobra ora bo tin debe, mester pag’e y cu interes riba dje, placa cu bo por a inverti den bo mesun pais mes. Nos a papia cu Aruba mester cumpli pa tin un surplus di 1% den presupuesto di otro aña. Y den e proceso mester garantisa bon supervision financiero via e ley di Reino, cu awor ta den preparacion, y cu ey Aruba y Hulanda mester yega na un acuerdo den e tempo nos dilanti”, segun Staatssecretaris Van Huffelen.

A negocia “aanwijzing” pa “RAft”?

Mester menciona cu e ultimo aki ta un asunto cu Aruba a opone pa basta tempo, esta pa cambia e ley (LAft) cu ta atende e responsabilidad y poder di CAft, den un ley di Reino Hulanda (RAft). Ora cambia e ley, CAft lo no responsabilisa mas na Gobierno y Parlamento di Aruba, sino directamente na Conseho di Minister Reino y/of Parlamento di Hulanda. Henter e dinamica di supervision lo cambia y CAft lo haya hopi mas poder conpara cu awo, pasobra de facto, Aruba nunca ta cumpli cu nan recomendacionnan toch!

No a laga CAft: Otro aña tin mas recomendacion

Door di evalua e peticion pa duna Aruba un instruccion banda di e defensa di Aruba “zienswijze” y na final duna e maneho financiero di Gabinete Wever-Croes II rason riba conseho di CAft, por crea un impresion cu Hulanda a laga CAft cay? Riba e pregunta aki Secretario di Estado Alexandra van Huffelen a contesta cu “no”. El a argumenta cu e colegio di supervision financiero ta duna conseho y ideanan con pa mehora e presupuesto, pues kico bo por haci como pais pa drecha finansa publico. Esaki ta varia den, entre otro, door di pusha pa aumenta entradanan, door di cobra impuesto di forma mas rigido y eficiente, of door di aumenta impuesto, mientras di otro banda baha gasto door di spaar den bo aparato gubernamental, etc. Tur e tipo di consehonan asina tabata y ta keda masha importante. Pasobra si kier sigui cumpli cu e recomendacionnan di CAft, cu e aña aki tabata hopi abou, debi na efectonan di e pandemia, pero otro aña tur cos ta normal atrobe. Consecuentemente, otro aña mester logra un surplus den presupuesto y pa realisa esey mester sigui tur e consehonan di CAft.