Gobierno: Sevinger y Tromp ta mancha imagen di henter Parlamento

Dialuna den Parlamento, Prome Minister mr. Evelyn Wever-Croes a dirigi palabra na tur miembro di Parlamento cu ainda no a duna nan opinion riba e echo cu a sentencia Parlamentario Benny Sevinger pa corupcion. Prome Minster a bisa nan cu pueblo merece sa kico nan ta pensa tocante e sentencia.

El a critica tambe cu Marisol Tromp a keda tres aña sinta eyden siendo e tabata sa cu e ta un sospechosp di husticia. El a aporta na atacha e imagen di e instituto Parlamento.

Desde e sentencia di Corte di Husticia den e caso Avestruz, a tuma nota di diferente expresion, particularmente di sostenedonan di oposicion. Algo cu ta resalta ta expresionnan unda cu ta purba minimalisa e echo cu Parlamentario Sevinger a sali culpabel pa comete corpucion.

Prome Minister a bisa: “Bo no por bisa cu Benny Sevinger ta un tiki ladron of un tiki corupto, pasobra esey ta haci cu bo ta mes of mas ladron cu ne.”

Lamentablemente practicanan robes ta sigui tuma luga den e partido. A yega na conocemento di Prome Minister di paden di AVP, cu Parlamentario Mike Eman ta cobra un toelage como ‘fractie leider’ pero no ta traha como fractie leider. Pa cual Prome Minister a expresa cu cualkier persona cu ta haya un “toelage” of un pago cu e no merece, mester wordo atendi cu ne y kita esaki for di dje.

Esaki ta e momento pa demas Parlamentarionan entre otro Miguel Mansur, Marisol Tromp, Aquanette Gunn y Mervin Wyatt-Ras, cuminsa expresa nan mes y duna nan opinion pa pueblo haya sa kico nan ta pensa di e veredicto di Sevinger.

Rycond Santos do Nascimento, Gerlien Croes y miembronan di coalicion a duna nan opinion caba, pero e demas tambe mester duna nan opinion.

Finalmente Prome Minister Wever – Croes a enfatisa cu pueblo di Aruba merece scucha opinion di representantenan di pueblo riba e tema importante aki. “Si nan no sali duna opinion, ta pasobra nan ta mes of mas corupto y ladron cu Benny Sevinger.”