Gobierno lo paga 2 miyon pa scapa Eddie Briesen: Tur cos ta cla pa trata e ley den parlamento

Siman pasa Parlamento di Aruba a ricibi un proyecto di ley pa apodera Minister di Turismo y Salubridad Publico, Dangiu Oduber, pa e firma un acuerdo pafo di Corte pa soluciona un disputa cu a sugri desde aña 2009 na momento cu Pais Aruba a termina e contrato cu Lee Tofanelli and Associates Inc., cu durante Gabinete Oduber IV (MEP) tabata encarga cu organisacion di e ‘Aruba Music Festival’. Podise hopi lo no corda of lo no ta realisa e embergadura di e ley aki. Pero basicamente e ley aki ta pa tapa mal maneho di e mesun Gabinete Oduber IV despues di 13 aña ta exonera ex-minister Edison Briesen, actual consehero di Gobierno, di tur reponsabilidad y culpa pa a firma un contrato contra Ley di Contabilidad.

E “aanbieding” a sosode por medio di un carta firma pa Gobernador di Aruba, compaña pa firma di ministernan Dangui Oduber, Xiomara Maduro y Ursell Arends. Den e ley aki ta regla pa Gobierno yega na un “deal” cu e compania Mericano pa pag’e un suma di 1.5 miyon dollar Mericano. Di e forma aki Gobierno ta cubri nan gasto y perdida door di no tene e evento y na mes momento evita cu e compania ta persigui Eddie Briesen personalmente pa a mara Gobierno na un debe sin cu e tabatin aprobacion di Parlamento y sin presupuesto.

Raad van Advies tin pregunta

Prome cu por presenta e ley, a mand’e pa conseho di Raad van Advies. E ultimo a contesta Gobierno dia 20 di october 2022 cu mester check e asunto bon pasobra falta informacion. Hues a dicta cu un suma “redelijk” pa paga e compania ta 800 mil dollar, pues no ta compronde con diripiente e suma a subi cu no menos di 350 mil dollar! Pues, e “deal” a resulta mucho mas halto di loke hues a dicta den e caso.

Aruba Music Festival

E festival aki a trece artistanan di taya mundial den e genero di musica latino, jazz y R&B. A organisa Aruba Musc Festival na añanan 2002, 2004 y 2008 pa e promotor Mericano, Lee Tofanelli and Associates Inc. Den pito di eleccion 2009, Minister Briesen, e tempo ey a firma prologacion di e contrato pa añanan 2010 y 2013. Sinembargo, Minister Otmar Oduber (Gabinete Mike Eman I), cu recien a tuma encargo di e cartera di turismo, a para e contrato mirando cu a descubri cu a cera e contrato di prolongacion, violando Ley di Contabilidad di Aruba. Ley di Contabilidad ta dicta cu un minister cu cera contrato pafo di cuadro di ley di presupuesto ta personalmente responsabel pa esaki civil y penalmente!

Casonan den Corte

E promotornan a cuminsa cu un serie di caso den corte cu por a resulta cu e minister encarga cu Turismo y consehero di Gabinetenan Wever-Croes I y II, Edison Briesen, por a wordo poni personalmente responsabel pa e gastonan haci mientras cu no tabatin prespuesto pa cubri esakinan. Den Prome Instancia Gobierno di Aruba a haya razon den su caso, pero na final di 2016, den e caso di apelacion entama pa e promotornan, corte a determina cu Pais Aruba lo mester cumpli cu e acuerdo. Den caso cu no por cumpli mas cu e condicionnan stipula, lo mester cubri e gastonan y dañonan di e promotor pa cancelacion di e contrato. Den e caso aki Gobierno no a opta pa sigui e caminda legal, pero a prefera di presenta na Parlamento un ley pa apodera Gobierno pa yega na un out-of-court settlement di mas cu 2 miyon florin!

Mester menciona cu dia 24 di juni 2015 tabatin sentencia den e caso aki. Abogado mr. Jimmy Coutinho a defende e compania Mericano y abogado mr. Chris Lejuez a defende Gobierno di Aruba, e tempo ey di asignatura di AVP. Gobierno a gana e caso. E compania no a keda contento y a apela. Den sentencia di dia 22 di november 2016, tres hues a mira e caso diferente y a dicta na fabor di e compania di Merca. E tempo ey e compania a cambia di abogado y a busca Bufete Croes, Wever & Ruiz pa defend’e. Si nan ta su abogado ainda den e “deal” aki awor no ta conoci. Pero si ta asina, anto e ta hole na “conflicto di interes” pisa, pasobra por considera e bufete como “huis advocaat” di Gabinete Wever-Croes y ta famia directo di minister-president.

Integridad

Pueblo di Aruba ta sordo caba pa e monologonan di Prome Minister Evelyn Wever-Croes riba integridad cu den mesun rosea ta percura pa bufete di su tata, esta abogadonan Croes, Wever & Ruiz, tin contratonan lucrativo cu Pais Aruba, tur empresa estatal, como tambe contra partidonan di dicho empresanan. Mientras cu den Gobierno nan ta activamente busca tur manera pa atacha nomber di contrincantenan politico acusandonan di corupcion y di falta di integridad. Pero ora ta toca nan mes, nan ta busca tur manera pa ‘trek recht’ cosnan cu a bay hopi robes.

Yegando na un acuerdo pafo di corte y pagando Lee Tofanelli and Associates Inc., Gabinete Wever Croes II (MEP, RAIZ) ta pone man riba cabes di ex-minister di MEP y actual consehero di Gobierno, Edison Briesen, indemnificando e y terminando tur caminda pa Pais Aruba por pone personalmente resonsabel pa e gasto aki haci pafo di e cuadro legal.