Gobierno a reuni cu Directie Luchtvaart Aruba

Diabierna mainta, hunto cu su colega Minister Ursell Arends, Prome Minister Evelyn Wever-Croes a reuni cu Directie Luchtvaart Aruba (DLA). Director Aviacion Civil Aruba Edwin Kelly tabata presente den e reunion. Den e dianan aki, Aruba hunto cu ICAO ta pasando den tur e sistemanan di aviacion di Aruba pa haya un bista con bon Aruba ta prepara pa un audit den futuro. Ta un gran honor pa Aruba cu e ekipo cu a bin pa e assessment na Aruba ta un ekipo di experto den tereno di aviacion cu ta completamente un ‘all female team’ for di Corsou, Honduras y Mexico. 

“Awe mainta mi tabata tin e honor di topa e ekipo di damas aki y combersa cu nan. Nan a splica nos con ta bayendo cu e assessment y nan a informa cu nan ta hopi orguyoso di kico tur Aruba tin in place. Claro tin cosnan cu mester mehora pa asina garantisa mas ainda e siguridad di aviacion pero nan ta contento y satisfecho pa loke nan ta mira aworaki”, Prome Minister a duna di conoce. 

Prome minister a expresa cu Gobierno di Aruba, no solamente den nomber di Minister Ursell Arends cu ta encarga cu transporte, pero henter Conseho di Minister a duna e compromiso cu lo sostene Directie Luchtvaart Aruba den e assessment aki pa asina garantisa e siguridad den aviacion. 

“Mi ta gradici e ekipo tremendo di Directie Luchtvaart Aruba tambe cu tin varios profesional femenino pa tur e trabou cu nan ta haciendo. Tabata bunita pa papia cu e grupo di profesional aki cu ta kibrando barera. Hende muhe cu ta kibrando barera den tur sector y posicion pa asina crea un miho mundo”, Prome Minister Evelyn Wever-Croes a expresa.