Gobierno a mata comercio na final di Caya Grandi

Algun tempo atras e tram tabata yega te na final di caya y bin abou bek. Desde prome di december a opta pa habri e caya grandi pa auto por pasa, pues e tram te yega te ex-La Linda y bay bek den e area di waf. 

Frank Tieleman, comerciante, a duna di conoce cu pa nan e desaroyo aki tabata hopi dificil. El a yega di menciona cu e decision aki tabata uno abrupto. Mayoria di e negoshinan di Frank Tieleman ta enfoca riba e turista cu tabata subi e tram. Den luna di december el a cera dos di su negoshinan pasobra no tabatin ningun turista ta move den cercania. 

Cuater luna…a bay mas

El a sinta cu dos minister den luna di december y nan a bis’e cu e tabata un proyecto cu nan a purba di haci. E tabata un test di cuater luna. Frank Tieleman ta haya straño cu a scoge net e cuater lunanan cu tin crucero. Awo na april e tram mester a cuminsa pero e luna a caba y nada ainda. Na comienso di april nan a bis’e cu lo tuma conctacto cu ne. Inicialmente a bis’e cu e tram lo cuminsa core bek algun biaha pa dia pero ainda nada. Ni pa siman ni pa dia. 

Como comerciante e ta enfoca riba e herment cu gobierno ta duna pa por traha. Tempo cu e tram ta pasa, turistanan tabata baha den su negoshi pa cumpra. Den un siman di tempo a corta ful su entrada.  Di otro banda, e ta keda positivo. Awo e no ta conta riba e tram mas pero a opta pa haci algun evento pa trece hende den su negoshi. Dia di Rey e tabatin un show di auto riba Plaza Nikky Habibe. 

Evita “red tape”

Otro cos cu mester traha riba dje, segun Tieleman, ta e redtape cu tin pa haya permiso na momento cu kier organisa un evento. Mester hacie un manera cu por haya permiso mas facil. Segun Frank Tieleman, a diseña caya grandi cu diferente plasa y area unda cu por duna e comercio oportunidad pa trece actividad comercial. Awo no tin nada. Si Frank Tieleman no haci evento, e area ey lo ta morto morto. 

Durante e periodo di Covid, Frank Tieleman, a inverti basta placa. Tur inversion tabata enfoca riba e tram como cu e localnan no ta bishita caya grandi manera antes mas. Mester pensa kico ta hacie atractivo pa inverti y habri negoshi di caya.  Si wak mas leu, por te hasta haci e tiendanan den caya “tax free” pa asina e hendenan haya mas gana di cumpra y bishita caya grandi. 

Bunita so no ta conta!

Awo tin un desaroyo den Columbusstraat, esaki por ta di beneficio pa centro pero Frank Tieleman no ta mira cu esaki lo trece un fluho adicional pa caya grandi. Tipo di proyecto asina ta haci e caya bunita pero hende no ta cumpra den e tiendanan pasobra “tin klinker”. Ta dos cos separa cu Frank Tieleman no ta compronde e prioridad. 

E ceramento di caya pa tram tabata un “test case” pero te ainda no a papia cu ningun comerciante pa asina haya sa kico tabata e resultado di benta.