Gobierno a aproba presupuesto adicional di mas cu mey miyon pa centro y organisacion

Diadomingo 25 di september, Gobierno di Aruba, directiva di CEDE ARUBA conhuntamente cu Samenwerkende Fondsen a firma un adendum basa riba un protocol di colaboracion existente. E adendum aki ta un acuerdo unda cu Gobierno ta aproba un presupuesto adicional di AWG. 514.400, – cu ta destina pa e centro- y organisacionnan di bario. Tambe tin un otro presupuesto adicional di AWG. 350.000, – cu ta pa sostene iniciativa di fundacionan cu lo mester traha mas intensivo den bario. CEDE ARUBA di su banda lo pone e fondonan adicional disponibel y tin e tarea di acerca mas partner financiero pa colabora den esaki. CEDE ARUBA lo maneha y administra financiamento adicional menciona y lo hacie accesibel pa e organisacionnan di bario y e fundacionnan.

Gobierno di Aruba, CEDE ARUBA y Samenwerkende Fondsen ta convenci cu desaroyo den bario ta importante. Ora cu e hendenan topa sea ta riba caya of dentro di un organisacion den e bario of un centro di bario, ta unda ta conoce otro, aki ta siña con pa traha hunto y asina por desaroya diferente idea pa yega na un comunidad mas participativo. Door di stimula mas actividad social, cultural y educativo den bario, por mehora e relacion entre comunidad y e habitante di e bario specifico, pero tambe entre e habitante y organisacion cu por duna sosten. Esey lo resulta den mas participacion, solidaridad, harmonia y tambe mas siguridad den bario. Na final esaki lo hisa e “capital social” di cada persona. Por defini e capital social como e balor colectivo di tur red social entre hende y organisacion y e iniciativanan cu por sali for di esaki pa haci mas pa otro.

Durante ultimo 20 aña, e centronan di bario a ricibi un sosten minimo di Gobierno pa nan por eherce nan tarea den comunidad. E trabou di e organisacionnan aki ta depende mas tanto di boluntarismo y riba propio forsa haciendo recaudacion di fondo  pa por logra trece actividad. Varios di e organisacionan aki a enfrenta hopi reto den e ultimo decada. CEDE ARUBA y Samenwerkende Fondsen di Hulanda a duna sosten financiero na varios di e centronan y organisacion den bario, entre otro door di financia un profesional pa guia actividad y tambe ehecucion di e programa di actividad. E fondonan di CEDE ARUBA y Samenwerkende Fondsen semper ta temporal y p’esey a trece e retonan structural varios biaha na oido di Gobierno y departamentonan y nos ta contento cu awe e dia a yega cu nos por yuda p’asina trece un cambio. Gobierno a compromete su mes pa e periodo di 2022-2026.  

E programa lo hiba e nomber di “BARIONAN UNICO   y e meta di e programa ta pa sostene mas iniciativa comunitario, diversifica e programa- y servicionan den bario na diferente grupo y meta. Tambe kier uza e programa pa intensifica colaboracion cu e partnernan di comunidad, e fundacionannnan y e servicionan gubernamental y pa mehora e colaboracion entre e organisacionnan den bario. 

Entre otro lo enfoca pa:

• Mehora capacidad di personal di e centro- y organisacionnan 
• Evalua regularmente e forsa- y necesidadnan den tur bario cu apoyo di mas organisacion
• Desaroya y ehecuta programa anual pa e bario
• Crea un sistema facil pa financia iniciativa chikito den e barionan rond di Aruba
• Mehora e accesibilidad y promocion p’e actividadnan den bario
• Amplia e financiamento di programa y actividad cu mas partner nobo den futuro

CEDE ARUBA lo provee cu asistencia practico na e centro- y organisacionnan di bario y na mas partners pa por realisa e metanan menciona. E asistencia aki lo enfoca na e necesidad specifico, (‘tailor made’)  y na e situacion actual di cada organisacion.  

Durante e siguiente simannan lo duna presentacion na e diferente organisacionnan den e area social, cultural y educativo. E idea ta pa haci e programa aki mas participativo posibel, kiermen, tin hopi espacio pa e organisacion presenta nan idea y pensamento. E aprobacion di e fondonan adicional ta e comienso di e programa.