Gobernador: Ainda no ta sinti e recuperacion economico den tur cas

“Awe nos ta na vispera di un otro celebracion grandi, unda cu ta recorda nacemento di e Redentor, cu a bin na mundo, den un pesebre humilde, sin luho. Pero esaki tabata e regalo mas precioso cu humanidad por a ricibi. Cu e nacemento di nos Señor Hesus na mundo, a bin un temporada di Gracia di Dios, cu ta trece salbacion na tur hende. Esaki ta un di e motibonan principal di con hopi di nos ta stima e temporada aki”, asina Gobernador di Aruba, Alfonso Boekhoudt, a start cu su discurso nacional.

E gobernador a para keto un rato riba tur esunnan cu a bay dilanti y tambe mira bek riba un aña 2022 cu tabata un aña di recuperacion turistico y economico.

RECUPERACION ECONOMICO

Aeropuerto, waf y tiendanan tabata contento di por a ricibi bishitantenan cu a bolbe bek nos isla, di manera impresionante. Esaki ta haci nos sinti nos mes hopi privilegia di por biba, na e lugar bunita aki cu hopi kier bishita, maske ta pa un par di dia.

GRATITUD

Pero e storia aki di recuperacion y gran logro historico ta resumi solamente un parti di e aña aki cu ta casi tras di lomba. “Cu gratitud pa nan bida, nos ta recorda e sernan keri y figuranan publico stima, cu e aña aki a bay laga nos. Figuranan cu a sa di uni nos comunidad na nan manera y nan reconocemento publico tabata permiti nan pa ta e bos pa esunnan cu no ta wordo scucha. Nos a haya nos ta despedi mucho lihe, pero lo percura pa tene nan den nos memoria y curason. Un persona ta biba durante su bida, pero tambe den nos recuerdonan”, di acuerdo cu Gobernador Boekhoudt.

SITUACION MUNDIAL

Goberador Boekhoudt a para keto tambe n’e situacion mundial for di cual Aruba no ta un excepcion y cual a haci cu no tur hogar di Aruba a sinti e recuperacion economico den nan cartera. Un guera asina leu pero su consecuencianan tin su efecto riba nos isla.

PRESION SISTEMA DI CUIDO

Tambe Gobernador a toca e tema di nos sistema di cuido, cu tin varios aña caba cu ta bou di un presion enorme. Y ta come den e viabilidad financiero di e instancianan cu ta brinda e servicionan aki.

NOS MUCHANAN: NOS FUTURO

Nos muchanan tambe tabatin un atencion special di Gobernador, unda cu el a para keto riba e echo di por a comparti algun momento special cu nos muchanan door di bay cana cu nan den mondi. Nos muchanan ta nos futuro.

CANCER

E pashentnan di cancer, un lucha di tur dia a wak un luz briya na momento c’un hoben a landa entre Boneiro y Corsou pa recuada fondo p’e fundacionnan di cancer. Laga e luz di Pasco briya pa nos tur, pa nos pais y pa nos famia. E miho regalo no ta bin den un papel lora cu color bunita. Ta e mannan humilde cu ta yuda carga e cruz di otro.

“Laga e mensahe di Pasco ta e encurashamento pa ta mas cerca di Señor”, ta deseo di S.E. Gobernador di Aruba,  Alfonso Boekhoudt y famia.