Global Entrepreneurship Week ta klousurá un siklo di aktividat ku un almuerso i presentashon di Jeff Hoffman
WILLEMSTAD – Djárason mèrdia a tuma lugá un almuerso na Atrium di Banko Sentral di Kòrsou i Sint Maarten pa klousurá un seri ekstenso i variá di aktividat den kuadro di Global Entrepreneurship Week (GEW) Curaçao. Ofisialmente e siman a ser apuntá pa e organisashon mama, Global Entrepreneurship Network (GEN ), di 14 pa 20 di Novèmber, pero en bista di tantísimo aktividat organisá pa e komité di GEW mes, i e aña aki tambe pa un kantidat amplio di organisashon ku a partner ku GEW Curaçao, Fundashon Negoshi Pikiña (FNP), organisashon ku tin e lisensia pa organisá GEW na islanan di Karibe Hulandes, a pidi GEN pèrmit pa tene aktividatnan tantu previo, komo post e ‘siman’ mes. E petishon a ser aprobá i e presidente di GEN, sr. Jeff Hoffman, a programá den su agènda pa onra primeramente Boneiru i despues Kòrsou ku un bishita di algun dia na ámbos isla. Pa klousurá e loke ku finalmente a bira un Entrepreneurship ‘Month’, e komité organisadó di GEW Kòrsou a tene un almuerso ku komo ‘keynote speaker’, Jeff Hoffman den e Atrium di CBCS ku hopi bon asistensia.
Previo na e presentashon di sr. Jeff Hoffman, e presidente di Fundashon Negoshi Pikiña, sra. Elgenia Pieternella a hasi entrega di un plaka di rekonosementu na sr. Gabriël ‘Boy’ Magdalena, fundador i direktor general di General Catering Services, kompania ku e aña aki ta selebrá 50 aña di eksistensia. E ‘Lifetime Achievement Award’ aki, ta unu ku e GEW Kòrsou a bin ta otorgá ya pa algun aña na emprededónan i/òf organisashonnan lokal ku pa hopi aña tabata organisashonnan modelo den mundu di negoshi. Banda di su trabounan komo direktor di General Catering Services, sr. Magdalena, pa hopi aña tabata (i ainda ta) aktivo komo lider, miembro den direktiva òf konsehero di masha hopi organisashon. Manera e mes ta bisa, semper ku e propósito pa sirbi pais.
Sra. Pieternella a klousurá e ‘lunch’, ku palabra di gradisimentu na tur esnan ku di un forma òf otro a duna un aporte pa hasi GEW Curaçao 2022 eksitoso, muy en espesial e partnernan ku a kere den GEW Curaçao. Alabes sra. Pieternella a bisa di ta spera ku e por konta ku tur e partnernan pa aña 2023 i ku famia di ‘partnernan’ por sigui krese.
