Glenbert Croes cu peticion special: “Mike Eman please retira”

Dialuna mainta a inicia un reunion den Parlamento di Aruba relaciona cu costo di bida riba nos isla. T’un reunion cu e fraccion di AVP a pidi riba 16 di augustus 2022, pues como ocho luna pasa. E reunion ta netamente pa wak con por yuda e digno ciudadano pa tin un mihor calidad di bida. Sinembargo, a nota cu e reunion a bay den un rumbo completamente baho y manera semper; cu insulto sin fin. Ta netamente locual cu nos ta custumbra caba di nos politiconan, pa cual nan mes ta contribui cu e pueblo no tin mucho confiansa mas den politica.

Durante e reunion, cu presencia di henter conseho di minister, por lo menos un miniser a lanta para y dirigi un mensahe directo pa lider di AVP, mr. Mike Eman. Minister Glenbert Croes a cuminsa su discurso cu un cita dirigi na Eman. E mandatario a bisa: “Er is een tijd van komen en een tijd van, en Mike, je tijd van gaan is gekomen.”

E ta pidi e lider di AVP pa por fabor tuma su retiro. Croes ta sinti cu Eman su edad ta halto caba, pues sesentiun aña y ta tempo pa duna espacio pa e jongnan tuma over. Eman na e momento ey no a dicidi di pidi un ‘persoonlijke feit’ pa reacciona riba e minister. Tampoco ta conoci si Eman tabata den sala e momento ey.

Tocante MEP

Gilberto F. “Betico” Croes a funda Movimiento Electoral di Pueblo (M.E.P) dia 9 di februari 1971. Lidernan desde su fundacion tabata Gilberto F. “Betico” Croes, Nelson Oduber y Evelyna Wever-Croes. A participa 17 biaha den eleccion. Record maximo di voto: 25,172 (2001) y record minimo di voto: 8095 (1973). Den e ultimo eleccion na juni 2021, partido MEP a logra 20.700, bon pa 9 asiento den Parlamento. Nan ideologia ta Social democrata.

Tocante Glenbert Croes

Glenbert Croes, e actual minister demisionario di Labor y Asuntonan Social di nos pais, tin 55 aña di edad. Den eleccion di aña 2013 el a logra haya 2366 voto individual. Den eleccion di aña 2017, el a subi un poco y a yega 2491. Sinembargo, awo cu el a haya chens pa demostra su mes atrobe den gobernacion, su votonan a baha cu 22% y alcansa no menos di 1929 voto riba su nomber. Glenbert Croes a proyecta su mes den campaña como e minister cu a pusha pa trahadonan por a sobrevivi cu subsidio di salario of otronan cu FASE.

Den pasado Croes a funda su mesun partido OLA y a forma mas di un gobierno cu partido AVP e tempo aya. E mes a ocupa e puesto di minister y parlamentario. Na momento cu Hulanda a insisti cu e no tabata ministeriabel, su ruman Junior Croes a ocupa e funcion den su nomber y despues Willem Vrolijk.

Glenbert Croes ta casa y tin dos yiu muhe.

Tocante Mike Eman

Michiel Godfried “Mike” Eman ta naci na Aruba dia 1 di september 1961 y a sirbi como e di tres Minister-President di nos pais entre aña 2009 pa 2017. Su carera politico a inicia na 2001. Mike Eman a caba su estudio como hurista na aña 1992 y despues na 1996 a caba su estudio como notario.

Eleccion 2001 – 3933 voto
Eleccion 2005 – 6188 voto
Eleccion 2009 – 8068 voto
Eleccion 2013 – 8222 voto
Eleccion 2017 – 7822 voto
Eleccion 2021 – 6668 voto

Mester menciona cu despues di eleccion 2017, Mike Eman a anuncia cu e lo retira for di politica. Cu tempo, y despues di a pasa un tempo no activo pa motibo di enfermedad di su señora, el a regresa den partido y a bay eleccion 2021. El a menciona cu e biaha aki si, aunke e partido a sigui bay atras den voto y asiento, cu Eman lo ocupa e puesto di parlamentario.

Tocante AVP

J.H.A. “Henny” Eman a funda “Arubaanse Volks Partij” (AVP) na aña 1942. Lidernan desde fundacion tabata J.H.A. “Henny” Eman (welo), Cornelis A. “Shon A” Eman, Dominico Guzman Croes, Rudy Frank, Chibi Croes, J.H.A. “Henny” Eman, Robertico “Tico” Croes y M.G. “Mike” Eman. Na tur a participa den 28 eleccion. Record maximo di voto: 33,103 (2013) y record minimo di voto: 1209 (1977). Den ultimo eleccion na juni 2021 e partido a logra 18.335, bayendo atras di e partido mas grandi pa ocupa e di dos luga awo y bahando di 9 pa 7 asiento den parlamento. Ideologia di AVP ta Regional, Democrata Christian & Conservatismo.