Gisele-Mireille Sint Jago (PP): Un pordon sin representacion sin preparacion y sin sinti di Gobierno Hulandes

Mi a tuma nota di e ultimo declaracion di Gobierno Hulandes riba dia 3 di november 2022 (fuente: NOS) y di e declaracion di Minister di Proteccion Huridico di Hulanda, Minister Franc Weerwind, cu e Gabinete ta preparando pa pidi pordon den nomber di Estado Hulandes pa “E Historia di Sclavitud di Hulanda”, en conexion cu e aniversario di 160 aña di abolisacion di sclavitud, riba dia 19 di december.

Den apenas 6 siman Gobierno di Hulanda ta pensa cu nan por prepara y extende un pordon, na 8 luga pareu. Sin consulta cu NOS cu ta representante di nos antepasadonan. Despues di haci un investigacion y conversa cu varios persona den comunidad aki na Aruba y tambe cu organisacionnan riba nos islanan ruman, mi kier comparti lo siguiente.

Pordon di Rey Willem Alexander

Varios representante, stakeholder, organisacion y fundacion di cual nan directiva por completo ta existi di e multiple descendientenan directo di esunnan forsa den sclavitud, ta mira cu aunke e pordon aki a tuma su debido tempo, cu e ta algo necesario pa por cuminsa coregi e inhusticia y dolor profundo causa na nos antepasadonan. 

Acto criminal, inhusticia y falta di respet p’e ser humano di descendencia Africano, prolonga pa 159 aña mas y cu te ainda ta causa cu no tin oportunidad igual pa tur na Aruba y den Reino. Mi ta di opinion cu e pordon no mester bin di solamente e Gobierno Hulandes, pero tambe un pordon personal di Rey Willem Alexander, como descendiente directo di e prome Rey cu Reino Hulandes a conoce Willem I, desde aña 1815, ora Republica Hulanda y cambia y bira un Monarkia cu colonia Indones, Guinea Hulandes, Surinam y nos 6 Islanan referi na dje bou di e nomber Curaçao. Un famia cu te awe ta beneficia di e desicion- y e rikesanan acumula sea directo of indirecto durante sclavitud. Mescos cu Rey Willem Alexander a pidi pordon na maart 2020 na Indonesia, pa locual Hulanda su Gobiernonan anterior a comete durante e añanan 1945 y 1949, e Guera di Independencia di Indonesia. Despues di esaki Gobierno di Hulanda a warda 2 aña, te na februari 2022 prome cu nan tambe a extende un pordon oficial den nomber di e Gobiernonan anterior. Mi no ta papia pa ami so, ora mi ta bisa cu mi no tin e confiansa cu e pordon di Gobierno Hulandes ta inclui un pordon di Rey Willem Alexander. 

Banda di e pordon di Gobierno Hulandes y di Rey Willem Alexander, nos ta di opinion cu lo mester bin un reconocimiento cu sin duda e Sclavitud Transatlantico tawata un crimen structural contra humanidad, incomparabel cu cualkier otro tipo di esclavitud cu a tuma lugar den historia. Aproba pa parlamento y husticia, caminda leynan a wordo implementa pa haci e esclavitud aki uno pa bida, heraditorio y reduci e balor di e bida ser humano Africano na 2/5 parti animal. Algo cu nunca prome ni despues den historia a tuma lugar. Nada no a wordo menciona tocante di esey. Y awor, estado  responsabel pa a comete e crimennan aki, kier sigui dirigi ki dia y con nos antepasadonan ta wordo honra y conmemora? Haciendo tur pareu? Boso no a conquista tur colonia pareu. Hulanda a scoge pa 2022 ta e aña pa Gobierno Hulandes por cumpli cu tur pordon den un solo aña. Indonesia, Surnam y Caribe. Pero e proposcion ey no mester a aproba. E Gobiernonan mester a mustra e respet y sinta cu nos prome. 

Ken ta e decendientenan di esclabo Africano? 

Ademas nos a tuma nota cu na oktober 16, 2022, Minister di Cultura Xiomara Maduro, a presenta na pueblo cu e ta trahando riba e agenda di concientisacion di sclavitud na Aruba en conexion cu e aniversario di 160 aña di emancipacion, cu lo tuma luga na 2023. Esaki a tuma luga sin informa ni invita esunnan den comunidad cu pa hopi decada largo ta conmemora, celebra, informa y educa e historia di sclavitud den Caribe Hulandes di antes en general y na Aruba specificamente. Mi kier comparti cu pueblo, cu e comision di Minister Xiomara Maduro, cu a topa cu Luc Alofs, autor di e buki ‘Ken ta Rubiano’, pa traha riba e asunto di crea concientisacion riba sclavitud, no tin e sosten di esunnan cu realmente a keda afecta pa sclavitud. Maduro y Alofs sa ken tur ta e descendientenan di esunnan forsa den sclavitud? Den mi opinion e mesa ey tabatin mester di e representantenan den comunidad, cu ya caba pa hopi aña ta traha riba conscientisacion, cu of sin ayudo di Gobierno. 

Gobierno mester di consientisacion prome cu nos tur!

For di nos Islanan ruman, a informa nos cu eynan tambe e mesun situacion ta tumando luga. Caminda no ta informa e ‘stakeholdernan’ na ora, of no informa mes, ora tin reunion cu ta tuma luga cu Minister di Estado Hulandes Alexandra van Huffelen, tocante e historia di sclavitud. Cualkier reunion tocante nos historia di sclavitud, conscientisacion di sclavitud, celebracion di 160 aña di emancipacion di sclavitud, reparacion pa nos comunidad cu te awe falta e recursonan pa por a crea oportunidad igual pa tur, mester inclui esunnan cu nan famia a biba pa varios generacion cu e consecuencianan di sclavitud. E mester inclui esunnan cu nan antepasadonan a nace den sclavitud, cu conocese e storianan con nan famia a lucha pa bay dilanti y pa nan yiunan haya un educacion pa por a scapa e consecuencianan di centares di aña den emancipacion, cual t’e palabra cu ta predece emancipacion. No por papia di reparacion sin consulta pueblo di Aruba henter, incluyendo na prome luga e descendientenan directo cu despues di emancipacion di esunnan forsa den sclavitud, a lucha pa nan por a sobrevivi racismo, discriminacion y oportunidad desigual, cu mester a busca nan vivienda na diferente pais den Reino. Pa e motibo ami y mas hende cu mi, ta di opinion cu mester descarta e iniciativa di Minister Xiomara Maduro p’e conmemoracion di 160 aña di abolisacion di sclavitud sin e representantenan clave den nos comunidad. E plataforma- y organisacionnan cu ta lucha pa empoderacion di personanan di decendencia Africano, cu ta lucha pa oportunidad igual, pa derecho humano, igualdad, husticia y contra racismo, discriminacion, pa uni y pa NOS tur hunto invita Xiomara Maduro, Alexandra van Huffelen, Franc Weerwind y Marc Rutte cu te cu aña pasa a bisa cu Gobierno Hulandes no mester di extende un pordon. Nos ta invita nan pa tuma asiento na NOS mesa! P’asina nos ta inclui for di comienso di cualkier iniciativa tocante a conmemoracion di NOS antepasadonan, pa discuti na un manera digno y habri riba e topico di Historia di Sclavitud den Caribe Hulandes. Nos kier duna honor na nos antepasadonan cu a sacrifica nan bida durante sclavitud. Cu mayoria di nan a biba 4 pa 7 aña so despues di a sobrevivi y ‘Middle Passage’. Algo cu a tuma luga, no pa cinco aña, manera a holocaust Hudiu, pero pa un centenar di aña durante e ‘Black Holocaust’. Pues, e pordon lo ta un paso grandi den e direccion corecto, pero cu a exclui e gruponan mas clave for di e reunionnan den Caribe Hulandes, ta un prueba cu e concientisacion mester cuminsa cu e mandatorionan mes, pa nan realisa cu bo no por exclui esunnan, cu tin multiple descendiente Africano, for di e conmemoracion, reconocemento y organisacion di reparacion p’e crimennan contra humanidad cu a tuma luga durante sclavitud. Laga Gobierno cuminsa cu e conscientisacion di nan mes prome! 

Esun cu a haci e ofensa no por dicidi! 

Dia 3 di november 2022 a anuncia cu kier pidi pordon y dia 19 di december 2022 kier ehecute? Esey pa mi, kiermen cu tin un otro agenda scondi, manera e crisis di energia cu Hulanda ta pasa door di dje y e gas cu a haya na Suriname. Pasobra si no, lo a tuma full un aña pa prepara, informa y educa tur hende p’e pordon ta e climax di un aña di concientisacion y tur hende compronde su balor y respeta e momento aki como debe ser. E pordon mester ta bon prepara, incluyendo esunnan cu di berdad sa kico e balor y e nificacion ta di e pordon p’e crimennan cu a tuma luga durante Hulanda su participacion den sclavitud. Hulanda NO ta bay haya djis 6 siman pa prepara un pordon cu nos ta wardando riba dje pa 159 aña largo y sin debido representacion! Tampoco sin un siguransa cu Rey Willem Alexander tambe ta extende un pordon den nomber di e Monarkia Hulandes estableci durante sclavitud. Esun cu a haci e ofensa, no por ta esun cu ta dicidi!