Gisele-Mireille Sint Jago (PP): Mi a finalisa mi Bachelor den Ley

Durante e vakantie di scol mi a traha duro riba e dos ultimo materia cu mi mester a caba pa mi keda cla cu mi estudio di Bachelor di Ley na Universidad di Aruba. Siman pasa mi a haya e resultado di mi papernan, cu a haci mi hopi feliz. Mi a logra finalisa mi estudio di Bachelor di Ley y por carga e titulo di LL.B. awo.  

Stage na Ombudsman Sint Maarten 

Mi tabatin e honor di ta e prome studiante di Universidad di Aruba cu a a logra un stageplek na Ombudsman Sint Maarten. Mi a traha un adviesrapport pa Ombudsman Sint Maarten, tocante e ultimo veredicto di Corte Constitucional di Sint Maarten, di dia 1 di november 2021. Mi tabatin e honor di traha hunto cu Ombudsman Gwendolien Mossel, LL.M y su coleganan. Caminda Secretario General mr. Randolf Duggins, LL.M y Legal Advisor Aishira Cicilia, LL.B tabata mi begeleider. Locual mi a descubri durante mi investigacion huridico lo wordo publica door di Ombudsman Sint Maarten. E investigacion cu mi a haci den nomber di Ombudsman Sint Maarten y e rapport cu mi a skirbi, cu ta yama “Het Recht van de Zwakste!”, ta toca e derecho di autodeterminacion cu nos tin como un pueblo cu tabata ful colonisa pa centares di aña largo. E nomber di rapport ta traduci como: “E derecho di esun mas ‘Zwak’.” Pa e investigacion y rapport di conseho aki, mi a logra un 9 como eindcijfer. 

Bachelor Tesis di Ley

Fuera di esey mi a uza henter e vakantie pa skirbi mi tesis. Mi a scoge como begeleider mr. dr. Carel Smith di Universidad di Leiden. Un profesor masha renombra na Hulanda. E ta un gastdocent y ta duna un curso na Universidad di Aruba tambe. Pa caba cu mi tesis, mientras mi tawata traha riba e otro proyecto di Ombudsman, tabata un ‘careda contra holoshi’. Sinembargo, e tabata toca un topico cu semper mi ta pasiona di dje: Combati inhusticia! E titulo di mi tesis ta: “Nou Breekt Mijn Klomp… Eenheid in het minderjarige vreemdelingenbeleid binnen het Koninkrijk.” Unidad den Leynan di immigracion pa hobennan menor di edad den Reino. Den tur mi 28 aña den Enseñansa y como politica, mi a topa masha hopi hoben, super inteligente y bon mucha. Tur tin soño di kico nan kier logra den bida. Mi a nota un tristesa bou di esunnan (menor di edad) cu tambe a nace na Aruba, pero cu no tin nacionalidad Hulandes. Nan ta cay bou di articulo 3 sub 1 paragrafo H di e LTU di Aruba y tin admision, ‘Van Rechtswege Toegelaten’.  Ora cu nan haal nan diploma di EPB, Mavo, Havo of VWO cu nan 16 of 17 aña, nan no ta cualifica pa por opta pa un paspoort Hulandes ainda. A base di e ley: Rijkswet op het Nederlanderschap, nan mester ta mayor di edad. Sin un paspoort Hulandes nan no por pidi un Aruba Lening tampoco, pasobra den e Landsbesluit Voorwaarden Studieleningen ta bisa cu bo mester tin Nacionalidad Hulandes. Pues, nan no por haya un Arubalening pa studia na EPI of afo. Nan no ta bin na remarca tampoco pa un fiansa di studio di DUO y mester paga un suma di collegegeld cu ta cuater biaha mas halto ora nan yega Hulanda. Ademas ora nan sali for di Aruba y regresa bek, nan mester warda dos aña pa por aplica pa un paspoort Hulandes a base di RWN. Mi a repasa tur 5 ley di imigracion den Reino, tratadonan Internacional, Statuut y differente Landsbesluit y a yega na un conclusion alarmante pa pais Aruba, pero cu lo beneficia tur nos hobennan. Mi Bachelor Tesis tambe a wordo controla y mi a haya un 9 como eindcijfer. 

Palabra di danki na Dios

Cu e dos puntonan aki mi a caba mi estudio di Bachelor di Ley. Mi ta yama Dios danki pa e forsa y perseverancia cu el a brinda mi. Tambe mi ta gradici mi defunto mayornan Beulah Philips dfm y Marcelino (Chon) Sint Jago dfm pa e ehempel cu nan e duna mi di sigui studia henter bo bida largo. Danki na mi yiu Luciano, cu a uza mi mesun palabranan contra mi, pa motiva mi <3. Tambe danki na tur famia, amistad, colega y profesional cu na un of otro manera a sostene mi moralmente. Mi ta masha agradecido cu mi tin conosemento educativo y huridico awo pa yuda esnan cu mi por. Un palabra di motivacion na tur esunnan cu ta pensando pa siña algo nobo, pa sigui un curso of estudio, pero ta sinti un poco insigur: “Bay p’e!!, Lo tin dianan bon y malo, pero na final, e unico cos cu ta conta, ta cu bo a purba y bo a siña algo nobo!”

Gisele B. M. Sint Jago LL. B, B.Ed.