Gisele-Mireille Sint Jago (PP): A haya sosten mundial p’e manifestacion dilanti Rey Willem-Alexander

E multitud di apoyo cu nos di Pueblo Prome a haya a surpasa nos expectativa. For di Aruba y tur parti di Reino Hulandes nos a ricibi sosten pa e protesta cu tabata tin cuater simbolo tradicional.

E color cora y blanco di emancipacion. Para pia bou pa conecta cu mama tera. Uzando un bos y canta mescos cu nos antepasadonan tabata haci den protesta y hisa e bandera cora, preto y berde di fraternidad Africano den e Diaspora. Di Brasil te cu Jamaica, Finland te cu Francia, Kenya te cu Sur Africa, nos a haya sosten di individuo y di organisacion na Hulanda y Merca pa mehoracion di e posicion social economico di e ser Africano pa via di e efecto di sclavitud y colonisacion.

Den e manifiesto firma pa Michael Williams y Gisele Sint Jago di partido Pueblo Prome tin e meta di e manifestacion ampliamente splica:
1. Pordon di Rey Willem-Alexander pa e crimen cu Estado Hulandes a comete y e participacion den sclavitud di su propio famia Real y asina cumpli cu un trato igual. Estado di Indonesia si a ricibi un pordon di Rey Willem-Alexander riba dia 15 di maart 2020, dos dia despues cu Covid-19 a dal Aruba. Y riba 17 di februari Estado Hulandes a extende su pordon na Indonesia pa e crimen contra di Humanidad durante nan lucha pa Independencia for di Hulanda como un pueblo colonisa.
2. Ancra den ley cu sclavitud tabata un crimen contra humanidad, pa asina declara nos antepasadonan un ser humano. Esey ta e unico manera corecto pa yega na un rehabilitacion legal pa asina cuminsa cura e dolor di e cadena di emancipacion y reconoce su efectonan den comunidad te cu awe:
3. Reparacion pa e descendientenan Africano di sclavitud. Mescos cu a wordo haci door di Alemania cu e sobrevivientenan di Guerra Mundial II, cu pa 78 aña largo caba ta ricibi reparacion pa individuo, pa estudio, pa lanta negoshi, proyecto social, pa iniciativa manera mudea, pelicula etc. Te cu awe, Alemania a paga 90 biyon na e victimanan hudiu y nan famia.

Tene na cuenta, cu Sint Jago a manda un carta te na Tweede Kamer na Hulanda y a protesta durante e reunion di Comision di Conmemoracion di Sclavitud na Aruba dia 19 di januari. Gabinete Hulandes no a reacciona riba e kehonan den su carta di dia 8 di januari. Riba e rapport ‘Cadena di Pasado’, di e Grupo di Conseho nan a tarda diesocho luna largo pa reacciona, mientras normalmente Gabinete Hulandes ta reacciona riba e mesun dia cu un rapport ta wordo publica. Dia 25 di januari 2023, den debate tocante e historia di Sclavitud, Minister Presidente Rutte a bari mayoria conseho huridico y di rehabilitacion den e rapport for di mesa. E tabata mi deber como descendiente dje lesnan emancipa pa haci uzo di e derecho cu mi antepasadonan no tabata tin. Y cu amor y respet pa mi antepasadonan mi a haci uzo di mi conocemento huridico, responsabilidad politico y posicion como invitado pa expresa den nomber di tur ciudadano di descendencia Afrocaribense y manifesta na un manera pasivo respetuoso, pero fuerte nos malcontento sin kibra ningun ley.

Estado Hulandes a demostra durante Covid-19 y durante e ultimo dos aña cu e pordon tabata na caminda, cu nan no ta respeta nos derechonan aki na Aruba. E pordon a wordo hala padilanti, sin consulta cu ningun grupo di interes y sin tene cuenta cu e conseho di e Grupo di Conseho. Retrospectivo, mi por bisa, cu ami ta convenci cu e pordon y e bishita real a wordo planea pa cumpli cu e exigencianan di Nacionnan Uni. Nacionnan Uni a yega Aruba dia 2 di februari 2020, net dos dia despues di e bishita real, y 3 siman despues cu Gobierno di Aruba a anuncia cu COHO no ta bay door mas.

E ekipo di Nacionnan Uni a bin pa controla si Gobierno Hulandes ta cumpli cu articulo 73 di e Convenio, cual ta bisa cu Hulanda tin e sagrado responsabilidad y tarea pa cuida e teritorionan cu el a yega di hiba su administracion riba dje. Cu Nacionnan Uni ta akinan no ta un coincidencia. Mescos cu e no tabata un coincidencia cu ami, descendiente di “catibo” no kier a sinta eyden sin duna honor y representacion na tur nos antepasadonan cu a wordo maltrata, viola y mata.
Mi no tabata tin mester di pidi permiso di ningun hende, ni di rey, universidad, gobernador, Secretario di Estado. Esey ta un pensamento colonisa. Na ningun momento e personanan Africano forsa den sclavitud a wordo pidi algo. Aruba ta e unico pais den Reino Hulandes cu a logra elimina su historia di sclavitud efectivamente, sinembargo ta esclavo y descendiente di esclavo a traha riba plantacion e den mina, a traha caretera, Fort Nassau y Hotel. Pues, mi no ta tuma ningun hende na malo cu no compronde e pakico. Educacion y division ta e manera cu e colonisado Hulandes a logra di indoctrina pueblo di Aruba. Mi no ta djis bisa cu educacion ta e arma mas poderoso pa cambia mundo, mi a prueba esaki. Gobierno di Aruba a kita sclavitud for di e agenda di e bishita real. Pueblo Prome, den nomber di e descendientenan Afrocaribense a pon’e bek.