Gijs Mantel ganador CBCS Economic Research Award 2022

 

Willemstad/Philipsburg – E aña aki Sr. Gijs Mantel, studiante di VWO di Vespucci College na
Kòrsou, a gana e premio mayó di e kompetensia di CBCS Best Economic Research Award pa su
tarea di investigashon ekonómiko (‘profielwerkstuk’) titulá ‘Restaurant Gouverneur De Rouville’
tokante faktornan ku por mehorá e posishon kompetitivo di e restorant riba merkado lokal. E
hurado, presidí pa Sr. José Jardim huntu ku Sr. Alberto Romero, Sr. Russel Voges i Sr. Eric Matto
komo miembro, tabata unánime den su desishon. Partikularmente nan a apresiá e enkuesta ku Sr.
Mantel a realisá pa su tésis i a konsiderá su tésis original i kreativo den su kontenido. Sr. Mantel a
presentá e resultadonan prinsipal di su enkuesta durante di un selebrashon spesial na Centrale
Bank van Curaçao en Sint Maarten (CBCS), siguí pa e entrega di un premio. Tambe Sr. Mantel a
risibí un montante di NAf. 2,500.
E kompetensia di e aña aki tabata e di dos edishon di e kompetensia di investigashon ekonómiko,
ku a keda inisiá na 2018 pa stimulá e promové investigashon riba e ekonomianan di Kòrsou i Sint
Maarten. Tantu studiantenan di HAVO i VWO na Kòrsou i Sint Maarten komo studiantenan di
bachelor òf master na universidatnan lokal i internashonal por partisipá den e kompetensia aki.
Pa partisipá na e kompetensia, studiantenan di HAVO i VWO por a entregá nan tésis investigativo
di nan kuríkulo di ekonomia di skol, miéntras studiantenan riba nivel di bachelor i master por a
partisipá ku nan tésis di graduashon. E aña aki, studiantenan di nivel HAVO i VWO na Kòrsou i Sint
Maarten a partisipá na e kompetensia. Riba nivel di bachelor tambe tabatin partisipante.
E hurado a evaluá kada tésis riba su método di investigashon, originalidat, kreatividat, abilidat pa
skibi, presentashon i relevansia pa e ekonomianan di Kòrsou i Sint Maarten. Despues di un
evaluashon ekstenso e hurado a disidí unánimemente ku Sr. Gijs Mantel meresé e premio di e
CBCS Best Economic Research Award di 2022.
CBCS ta felisitá e ganador i ta gradisí tur otro partisipante di e CBCS Best Economic Research
Award di 2022 i ta keda den antisipashon pa e próksimo edishon.
Willemstad, 18 di yüli 2022
CENTRALE BANK VAN CURACAO EN SINT MAARTEN