Giants Aquatics Aruba tin website y uniform nobo

Diahuebs ultimo Giants Aquatics Aruba a batisa nan uniform y alabes a lansa nan website nobo. Segun Jordy Groters, head coach y fundado di Giant Aquatics Aruba, kier a haci esaki den un forma hopi grandi pa celebra e team, pasobra ta un paso grandi p’e team, door cu den tur e tempo cu ta operando caba, no tin un uniform oficial y ta mustra hopi uni ora cu tin algo asina pa por cana hunto cu ne durante e desfilenan oficial of riba dia di biahe. Esaki ta trece un confiansa cu ne tambe.

E CLUB

Groters ta sigui bisa cu a funda e club na januari 2020, net prome cu e pandemia. Na momento cu e pandemia a dal, mester a para un rato mescos cu tur otro deporte na Aruba. Pero na juni 2020 tabata opera completamente bek.

E team ta consisti di 58 atleta den e team competitivo den landamento. Tin mas di 30 adulto den master’s team. Tambe nan a lansa e disciplina di waterpolo unda cu nan tin 10 atleta registra.

PREMIO

Durante su trayectorio, Giants Aquatics Aruba tin masha hopi medaya gana. Segun Groters nan a logra gana 33 medaya di oro durante e campeonato nacional di e aña aki y internacionalmente tin atleta cu a gana medaya di oro n’e weganan di Junior Panamericano na november 2021.

CATEGORIA E muchanan di mas jong ta di 7 aña y tin atleta di 23 aña tambe. No ta restringi na cierto categoria. Cualkier mucha di cualkier edad ta mas cu bonbini pa join e team.