Gianni’s Group a presenta “GG Social Impact” riba Dia di Tera

Diasabra ultimo Gianni´s Group a impacta cu nan proyecto nobo “GG Social Impact”. A lansa e proyecto aki durante e di dos edicion di “Earth Day – Candle Light Dinner”, na Azia Restaurant & Lounge, cu mas di 140 bishitante. A start e evento cu un “Zero-Waste” Cocktail na e terasa di AZIA Restaurant & Lounge. 

Na mes momento tabatin oportunidad pa network y presencia e proyectonan di “GG Social Impact” mas di cerca. CFO di e compania, Daniele Ferrara, a habri e parti oficial di e evento cu un presentacion di tur e proyectonan cu Gianni’s Group ta ehecutando riba inversion social, conservacion ambiental y bienestar di empleadonan.

“Guia cu nos curason semper ta un di nos principionan fundamental, cu ta inclui den e nucleo di nos compania – awo, nos focus ta nos hendenan, planeta y ganashi – y yuda stimula desaroyo sostenibel na Aruba. Impacto social ta nos manera pa mustra liderazgo cu accion y no cu palabra” ta locual e CFO Daniele Ferrara. Den 2022 Daniele Ferrara a tuma un periodo liber for di su funcion den e compania pa bay haci trabounan boluntario pa diferente proyecto social na Africa, Nepal y India.

“Aña pasa, nos a traha duro cu un grupo di persona for di diferente departamento di e compania pa desaroya nos strategia di impacto social y nos ta masha orguyoso pa anuncia cu nos a caba di bira miembro di e comite ambiental di AHATA. Cu e rol nobo aki, nos kier stimula aliansanan fuerte na Aruba y mas aya cu ta duna bek na e hendenan pa medio di nos dedicacion na servicio, brasando diversidad y guia pa ehempel. Servicio ta nos principio fundamental pa tur cos cu nos haci – awo nos tambe kier sirbi e planeta”, ta locual e Deputy CEO y lider di impacto social, Kirti Daryanani, a duna di conoce.

Gianni’s Group, un compania local di F&B establece na aña 1984, a implementa un cantidad di actividadnan den nan 13 restaurantnan y operacionnan, mustrando nan compromiso cu impacto social door di proyectonan manera: 

• Maneho di desperdicio (reciclamento di papel, azeta di cushina, snerp di papel) 

• Produccion di energia y sistemanan circular (panelnan solar, awa di airconan) 

• Digitalisacion di servicio y operacion(GG2GO, CiaoGG, Software)

Gianni’s Group a brinda sosten tambe na e hobennan di nos comunidad pa medio di actividadnan pa haya fondo manera “Gianni’s Group Walk and Run” y organisacionnan local manera scolnan di SVGA: “Pasadia Briyo di Solo”, Centro “Man na Obra”, Scol Caiquetio y “Scol Scucha nos”, SECA, Soccer Education Center Aruba, “A Brighter Future Academy” y Heart-Centered Leadership Foundation. E trabou continuo di e compania ta pa crea un balansa entre hende, ganashi y planeta, conoci como e “triple bottom line” door di a haci e iniciativanan corespondiente cu e metanan apropia di “United Nations Sustainable Development Goals”, tambe conoci como UNSDG 3, 8, 12 & 17. 

E metanan aki ta consisti di salud y bienestar, trabou decente pa tur hende, crecemento economico, consumo responsabel y produccion y aliansanan. Esaki ta ser guia pa e Team di “GG Social Impact”, un adicion na e structura di compania desde aña 2022, cu ta lidera door di e Deputy CEO di e compania kende a studia na e “UN University for Peace y HEC Paris” cu ambos a inclui cursonan riba practicanan sostenibel.

E concepto di “Earth Day” a ser crea pa yuda hende keda mas alerta riba desaroyo sostenibel y e necesidadnan pa proteha e medio ambiente. E bishitantenan a disfruta di un “Candle Light Dinner’ cu musica y entretenimento en bibo, cu un “four-course menu” y biña organico di Arion Wine Company.

Daniele Ferrara a finalisa e evento compartiendo e siguiente cu e bishitantenan: “Mirando e situacion actual na Aruba, nos na Gianni’s Group kier promove solucionnan mas innovado ora ta trata di desperdicio, reciclamento, energia limpi y en general con nos ta trata nos isla, poniendo e ser humano central. Esaki ta nos receta pa exito y tambe lo sostene desaroyonan sostenibel di Aruba”.