Geoffrey Wever: Programa di BeYourOwnBoss a termina cu grupo grandi di graduado

Qredits Aruba ta conoce otro clausura di su programa BeYourOwnBoss. Minister di Asuntonan Economico, mr. Geoffrey Wever tabata t’ey presente pa asina tambe extende un palabra di felicitacion na e grupo nobo di graduado di e programa BeYourOwnBoss.

E mandatario a indica cu Gobierno di Aruba ta kere firmemente den stimula entrepreneurship, y p’esey ta contento cu Ministerio di Asuntonan Economico por a colabora cu Qredits Aruba pa asina haci e curso di BeYourOwnBoss ta mas accesibel pa comunidad, mirando esaki ta cuadra cu e vision pa stimula entrepreneurship.

“Cursonan manera BeYourOwnBoss ta siña e participantenan habilidad valioso di por maneha un negoshi, no solamente e administracion y mercadeo, pero tambe e obligacionnan cu pais Aruba ta exigi cumplimento cu ne. Esaki ta importante pa por stimula mas empresario, pa nan por tin miho oportunidad pa ta exitoso”, minister Wever a menciona durante su disertacion.

E cursonan asina por yuda stimula desaroyo economico. Door di sigui educa nos comunidad, ta creando oportunidad pa mas ciudadano mehora nan talentonan empresarial y realisa nan soño of eherce nan talentonan.

“Mi ta desea tur e graduadonan exito y perseverancia pa nan por logra nan meta di ta nan propio hefe” – minister Geoffrey Wever.