Geoffrey Wever: “Mi no a spera caso di corupcion den e gobernacion aki”

E e echo cu Geoffrey Wever a retira for di Plataforma Raiz, pensando pa bay eleccion cu un otro partido, no ta motibo pa daña e relacion personal y mucho menos esun como colega den Conseho di Minister. Esaki ta loke e minister demisionario a indica.

“Nos por garantisa comunidad cu nos ta pone relacionnan profesional na prome luga. Nos ta ministernan di pais Aruba y nos tin e tarea pa goberna te ora cu bini un gabinete nobo. Esey ta e entendimento cu nos a haci cu otro y e compromiso cu mi tin cu pueblo.”

E ta bon pa sigui riba bon pia pa e pais no cay den caos, Wever a bisa. Y a agrega cu esey ta e compromiso  cu tin. E relacionnan ta keda profesional y demostra asina tambe di goberna di un forma profesional.

Pa loke ta reparticion di e carteranan di ex-Minister Glenbert Croes, e minister demisionario aki a indica cu e mes no ta interesa pa tuma e carteranan di su ex-colega. Apenas e proceso ta cuminsa pa loke con ta bay haci cu e ministerionan cu tabata cay bou di Glenbert Croes.

Pero na mesun momento el a indica cu Croes tabata un minister di partido MEP pues ta keda na nan pa dicidi con reparticion di e carteranan ey ta bay. “Ami no tin ningun interes particular pa haya un cartera  na e momentonan aki. Pero si haci un apelacion na mi persona, mi ta habri pa coopera semper den e fase di transicion. Pero no cu ami ta bay pidi un cartera.”

“E tabata definitivamente un dia hopi scur y mi ta kere cu nos tur ta hopi desapunta di e desaroyo aki,” el a bisa.

Aunke cu el a mira e desaroyo di e caso Portulaca, y detencionnan cu tabatin rond di e minister, e ta keda un dia scur y un desapunto cu e situacion. Nos ta spera cu Ministerio Publico haci su trabou y haya sa kico ta e acusacionnan. E ta keda un decepcion pasobra nos a mira tanto caso di corupcion den politica cu e ta pone bos votadonan pensa dos biaha pa ken nan vota.”

Aunke cu no a declara Glenbert Croes culpabel, e situacion ta keda manera un nubia scur riba politica. E politiconan cu bay campaña, lo haya expresionnan cu “no ta kere den politico mas”. E mes a spera cu durante e gobernacion aki lo no a topa cu tipo di situacionnan asina, “pero lamentablemente nos tin cu deal cu esaki.” Esaki tabata palabranan di e minister demisionario Geoffrey Wever.