Geoffrey Wever: Inflacion di Aruba ta depende di desaroyo internacional

Dialuna Conseho di Minister tabata presente den parlamento pa trata e topico di aumento di costo di bida. Minister di Economia a trata diferente topico, unda el a splica cu nan a busca un manera cu inflacion a impacta pueblo menos.

Minister di Economia, mr. Geoffrey Wever, a indica cu e reunion a bay bon y tabata yama pa oposicion, y a cumpli cu esey unda a duna contesta riba e preguntanan. Den Wever su disertacion, e ta lamenta cu Mike Eman, e integrante prominente di AVP no tabata presente, mirando cu nan a yama e reunion. Aunke si a conta cu presencia di Gerlien Croes y Ryçond Santos do Nascimento.

Hopi pregunta tabata haci na su persona, entre otro di economia, costo di bida y tur ta relata bek na inflacion, aumento di prijs. Den su preguntanan e mandatario a purba duna un splicacion di kico ta impacta e prijsnan, kico ta impacta inflacion. Tambe con e inflacion local ta y kico e desaroyonan ta. E parti mas importante pa su persona tabata unda el a splica con gobierno tambe tin influencia riba inflacion, por ehempel loke ta trata prijs di awa y coriente. E decisionnan cu nan ta tuma riba e tereno di belasting.

Wever a splica cu na momento a permiti aña pasa na juli aumento di awa y coriente, a haci calculacion hopi rigoroso. E expertonan a haci trabou grandi pa mantene inflacion abou. E proposicion ricibi e tempo ey tabata di un aumento di 3% di inflacion cu ta hopi. Door di intervencion di gobierno, esey a keda na 1.7%. Gobierno tabata sa cu e prijsnan mester aumenta, pero a busca e manera pa impacta e inflacion menos posibel. Inflacion ta draai na final di dia p’e aumento di prijs. E decision tuma di gobierno pa no introduci BTW, pero aumenta BBO cu 1%, segun e mandatario, ningun di nan kier a aumenta BBO, nan no kier a aumenta e peso di belasting. Pero tabata necesario of obligatorio door di e rekisitonan imponi pa Hulanda. Nan mester a busca un forma con esaki ta impacta e pueblo menos.

Awa y coriente

E parlamentario a haci diferente pregunta riba awa y coriente. E mandatario a splica con nan a yega na e rebaho di 7.1% pa coriente. E no tabata asina no mas, pasobra nan a haci diferente trabou di calculacion. A pidi e companianan ki espacio mas tin, si por para inflacion. Tambe si tin otro modelo y e 7.1% tabata e maximo cu nan por a permiti sin kibra e companianan estatal.

Di un banda mester garantisa suministro di awa y coriente. E companianan mester ta solido, por cumpli cu nan compromiso cu banco, compromiso cu nan empleadonan. Di otro banda tin di corda riba e cartera di pueblo y eynan mester a busca un balans.

Gobierno a enfoca riba rebaho di coriente, cual ta e impacto mas directo pa inflacion. Pero segun Wever, minister Glenbert Croes ta den combersacion ki espacio tin pa awa. E ambicion ta pa sigui baha prijs di awa y coriente, pero aki ta depende di desaroyo internacional.