Un di e preocupacionnan mas grandi na Aruba actualmente ta e falta di persona pa yena e cuponan cu tin habri riba mercado laboral. Mas preocupante ta pasobra ta parce cu e hobennan no ta interesa. Esaki ta un tema cu Camara di Comercio ta trahando riba dje pa algun tempo caba y ta masha preocupa.
E preocupacion ta sinta den e echo cu hobennan no ta mustra interes den un trabou fiho. Segun por a compronde, e hobennan ta prefera traha mas cu un trabou, si contracto, pa motibo di e forma aki ta haya un miho entrada.
Esaki ta un problema mundial y diferente pais a ahusta nan salario pa logra haya mas hende den e proceso laboral.
Aki na Aruba e organisacion Camara di Comercio a duna gobierno como 20 sugerencia di kico mester haci pa haya mas hende envolvi den e proceso laboral. Tur e consehonan aki ta bou di estudio. Pero, Martijn Balkestein (Director), a bisa di forma categorico, un of dos medida cu tuma lo no trece un solucion inmediato. “Mester bini cu un serie di adaptacion pa alivia e situacion a termino corto y largo,” el a bisa.
Un di e obstaculonan ta e salario. Aunke cu mester bisa cu pa dos aña sigui a ahusta salario minimo. Balkestein a bisa cu e propio gremio comercial a sugeri pa hisa e salario minimo.
Pero mas importante ta pa logra cu ta adapta e Ley Laboral. Segun loke cu nan a tuma nota, e hendenan jong no ta mara nan mes pa bida largo na un compania. Esaki pasobra nan kier traha menos ora, traha flexibel y for di cas. Esaki ta un situacion cu no ta logra atrae e hendenan aki den e mercado laboral of wanta nan na Aruba.
Pa relato amplio abona riba TREMPAN.
Comment