Futura y Mastercard ta uni pa sostene Aruba su crecemento economico

Aruba Futura Foundation (Futura) y Mastercard a firma un Memorandum of Understanding (MOU), cu ta dirigi na impulsa innovacion den e entre otro manera con pagonan ta wordo haci, mientras cu lo promove inclusion financiero den e pais. Siendo un lider global den tecnologia di pago, Mastercard lo sostene Futura su habilidad pa promove y trece conscientisacion riba transformacion digital na Aruba, particularmente unda tin un oportunidad pa haya un miho perspectiva den tecnologia emergente y ‘best practices’ relaciona cu digitalisacion globalmente.

Den e ultimo añanan, Mastercard a desaroya y adkiri conocemento y capacidadnan pa sostene e necesidad di compania, organisacion, gobierno y consumidor pa por haci e pagonan den un forma cu no necesariamente ta rekeri e uzo di carchi.
“Futura ta colabora cu innovadornan, local y internacional, riba iniciativa- y proyectonan pa stimula e conocemento y capacidad di innovacion di e comunidad Arubiano. Futura ta orguyoso di tin Mastercard, un compania internacional renombra, como partner,” François Croes, director di Futura a expresa. “E ta ilustra e posibilidadnan di Aruba, siendo un isla chikito, pa interactua y colabora cu companianan internacional. Asina habriendo porta na un red extensivo, y un multitud di oportunidadnan.” Croes a termina expresando.

Den cuadro di e colaboracion aki, Futura lo wordo inclui den e netwerk di ‘City Possible’ di Mastercard. City Possible ta un comunidad di innovacion unda cu ciudadnan, negoshinan, organisacionnan, academiconan y comunidadnan for di rond mundo por colabora cu otro pa un futuro mas inclusivo y sostenibel. Futura lo tin acceso na informacion y experiencia riba diferente topiconan relaciona cu digitalisacion y innovacion for di Mastercard, y otro partnernan den e red. Futura y Mastercard lo uza e colaboracion unico pa crea y colabora riba diferente proyecto y iniciativa den sector publico, semi-publico, di NGO’s, y otro sectornan. Di e manera aki lo duna e comunidad e oportunidad pa por haya experiencia y conocemento pa por implementa nan ideanan.

“Na Mastercard, nos ta comprometi na comparti nos experiencia den sistemanan di pago y solucionnan innovativo pa por logra un crecemento economico cu ta robusto, resiliente y inclusivo. Innovacion ta den e centro di loke nos ta haci y nos ta contento pa traha cu Futura y e Gobierno di Aruba pa por yuda nan logra plannan digital,” Jimena Elia, Country Manager pa West & Dutch Caribbean Markets pa Mastercard a declara. “Nos participacion recien na Aruba Innovation Summit ta solamente e comienso di e colaboracion aki den cual nos lo combina e miho conocemento y otro bentaha pa yuda Aruba drenta den e siguiente fase di pagonan digital,” Elia a termina expresando.
Adicionalmente, Futura y Mastercard lo explora maneranan pa asisti y expande aceptacion pa digitalisacion door di negoshinan chikito y mediano den e pais. Esaki lo hunga un rol importante pa e recuperacion di henter e region. Mastercard ta sostene negoshinan chikito y mediano door di provee nan cu acceso na pagonan electronico, ‘social networking’ y instrumento pa mercadeo.

Desde Futura su comienso den 2018 su ekipo di innovacion a produci numeroso programa y iniciativanan cu ta contribui na aumenta Aruba su capacidad pa innova, manera e.o. tech labs, creacion di maneho innovativo y servicionan digital. Futura tambe ta colabora cu e organisacionnan local y internacional pa conhuntamente purba di resolve problemanan y lansa proyectonan pa acelera cambio sistematico riba e isla. Futura kier expande su conocemento y capacidad pa servicio por medio di su esfuerso di colaboracion cu Mastercard.
Pa mas informacion por bishita Futura su paginanan di social media y contact Futura na [email protected].