Fundacion Parke Nacional Aruba a duna tayer di Zoning & Regulations

Fundacion Parke Nacional Aruba (FPNA) como un organisacion independiente encarga cu e conservacion y maneho di areanan terestial y marino protegi na Aruba, ta anuncia cu el a keda cla cu e proceso di consulta pa e maneho di Parke Marino Aruba den colaboracion cu mas di 50 diferente stakeholders. E dos sesionnan a tuma luga dia 25 y 27 di october y tabata un exito rotundo unda cu a mira un participacion hopi interactivo y cu hopi perspectiva di stakeholders den diferente funcion crucial pa e maneho di Parke Marino Aruba. 

E tayer di Zoning & Regulations tabata un sesion unda cu e participantenan di diferente organisacion manera naturalesa, comunidad, autoridad, pesca y turismo a contribui na e maneho regulatorio di Parke Marino Aruba. Den e tayer aki, e team di Parke Marino Aruba cu ta cay bou di Fundacion Parke Nacional Aruba a presenta e resultadonan di e sesionnan cu a tuma luga den october 2022 cual a encera e resultadonan di un SWOT analisis (strengths, weaknesses, opportunities and threats) y un analisis situacional. Tambe e participantenan a delibera con pa incorpora e resultadonan aki den e zonificacion pa e cuatro areanan marino protegi (MPAs) cu hunto ta forma Parke Marino Aruba.

Sietske van der Wal, Interim Marine Park Manager di FPNA a comenta, “Nos ta hopi satisfecho cu con e tayernan a cana. E participacion di nos stakeholdernan ta sumamente importante pa asina FPNA yega na finalisa un plan di maneho cu ta considera di no solamente e meta primordial di conserva naturalesa y bida marino, pero tambe ta incorpora aspectonan social y economico. Di parti di FPNA mi kier a gradici tur stakeholder pa a tuma e tempo pa reuni cu nos y tambe pa tur nan contribucion valioso.”

E sesionnan di consulta pa e maneho di Parke Marino Aruba cu a caba di pasa, unabes mas lo bay presenta mas resultado cu lo keda incorpora den e plan di maneho di Parke Marino Aruba. Esaki lo ta comparti cu tur stakeholder den e prome kwartaal di 2023 pa asina nan duna nan punto di bista (‘zienswijze’) y despues di e proceso aki FPNA ta spera di publica e plan di maneho oficialmente.

FPNA semper ta keda dispuesto pa e reunionnan cu nos stakeholders ariba peticion. Pa mas informacion tocante Parke Marino Aruba of e proceso di consulta por tuma contacto via [email protected].