Fundacion Pa Nos Muchanan: Hopi mayor interesa den proyecto “Stima Mi Guia Mi”

Durante henter e luna di september, e di tres piloto di e proyecto di Stima Mi Guia Mi a tuma luga. Despues di e traspaso oficial cu a tuma luga na augustus , unda Kiwanis Club of Palm Beach a pasa e proyecto oficialmente na Fundacion Pa Nos Muchanan (FPNM), e preparacion pa e di tres piloto di Stima Mi Guia Mi a cumisa den ful swing. E interes di parti di e mayornan pa participa na e proyecto tabata uno sumamente grandi. Den tempo record a yega e maximo participantenan pa e di tres piloto.

E di tres piloto di Stima Mi Guia Mi ta dirigi na e mayornan cu yiu entre e edad di 2.5 pa 4 aña. A conta cu participacion di 12 mayor hunto cu nan yiunan. E grupo di participante a reuni un total di 6 bes, na unda nan a ricibi diferente workshops di Fundacion Pa Nos Muchanan, Tienda di Educacion y Fundacion Respeta Mi.

E mayornan a participa hunto cu nan yiu, na unda nan a toca e temanan: E importancia di e prome añanan, Introduccion di Mayor Sensitivo y Responsivo, E relacion entre mayor y yiu, E importancia di Desaroyo Social-Emocional, Limite y Disciplina, Desaroyo Social-Emocional pa medio di hungamento y interaccion durante actvidad diario & plan di sosten pa un mucha.

E encuentronan tabata yena cu informacion practico y tambe actividad interactivo. E muchanan tabata pasa un rato dibertido hungando cu otro bou guia di dos trahado pedagogico social, mientras e mayornan tabatin e oportunidad di ricibi informacion y comparti nan experiencia cu otro. Tambe tabatin momento pa e mayornan pone locual nan siña den practica cu nan yiu. Como “follow-up” di e curiculo lo organisa un “terugkomdag” pa e grupo di mayor participante y sosten individual unda ta necesario.

Nos ta felicita tur e participantenan y alabes gradici Kiwanis Club of Palm Beach, Tienda di Educacion, Fundacion Respeta Mi, Stichting Wit Gele Kruis y Centro pa Hoben y Famia pa nan sosten durante e ultimo simannan. Nos kier a informa mayornan di muchanan entre 0 pa 4 aña pa keda pendiente pa e siguiente rondo di Stima Mi Guia Mi.