Fundacion Kapel di Bethania cu concierto di Pasco den Klooster Imeldahof

Diabierna proximo,dia di 16 di december, Fundacion Kapel di Bethania lo habri e portanan di e Klooster Imeldahof, unda cu lo ofrece un concierto na encargo di e soprano Tica Giel.

Lo tin diferente koor di Noord cu lo canta diferente cantica di e Pasco y pa mantene e esfera aki lo tin cuminda y cos duhsi di e perido aki di fin di aña. P’e anochi aki, e entrada lo ta completamente gratis y e lo cuminsa for di 7:00pm, ora cu e koornan cuminsa cu nan presentacion.

Suzette Boekhoudt, Boluntario Fundacion Kapel di Bethania a bisa tambe cu lo decora e Klooster Imeldahof ful den ambiente di Pasco. Ta prome biaha cu ta habri e klooster den e oranan di anochi y den e esfera di Pasco.

Ta invita e pueblo di Aruba pa bin dia 16 di december, di 6:00 pm pa 10:00pm, unda cu ta haya e ambiente di Pasco di Nacemento, unda cu e diferente koornan lo duna un bunita presentacion pa e temporada di Pasco aki.

Fundacion Kapel di Bethania a lanta pa proteha e Kapel di Bethania. E ta un di e unico kapelnan di Aruba cu ta den su estado original aki na Aruba, cual ta algo masha special. Tambe lo sigui splica comunidad Aruba over di e historia di e soeurnan cu a biba na Aruba, cu a haci pa Aruba.

Nan a lanta Kinderhuis Imeldahof, nan tabata docente di scol. En corto, e fundacion kier resalta e importancia cu e soeurnan tabata tin p’e comunidad di Aruba en general.